Khliehriat, Jymmang 17
Ka Elaka Nongkhlieh ha ka 16 tarik Jymmang kala lum jingïalang bad ki trai jaka kiba don jaka puta ha Lum Syrman ka jaka kaba ka Shree Cement Limited ka thmu ban khlong ïa u mawshun.
Ïa kane ka jingïalang la pynlong ha ka shnong Moolasngi, ha ka jingdonlang u Secretary ka Elaka Nongkhlieh Ma Fencing Bareh bad ki dkhot Executive Committee kynthup u Ma Holding Bamon, Sedwik Bareh, Ebenezer Patlong, Hoimat Phyrngap, Dapbiang Sukhlain ryngkat bad ki Waheh shnong kiba hapoh ka Elaka bad ki trai jaka ba don jaka ha Block – I (Lum Syrman).
U Secretary Ma Fencing Bareh haba kren sha ki lad pathai khubor u la ïathuh, ïa ka jingpynbeit ka Dorbar Elaka bad ka Shree Cement Limited kaba la long ha ka 25 tarik Ïaïong, 2026 ban siew ïa ki trai jaka kiba don jaka ha Lum Syrman, bad ha ka sngi Saitjaiñ, ha ryngkat ka jingdonlang ki trai jaka, ka la rai ban siew ïa ki trai jaka katkum ka jingheh ki jaka jong ki.
Haba pynshai halor ka jingai jaka ban tih mawshun da ka Shree Cement Limited, u Ma Fencing Bareh u la ong, ka Elaka ka khlem die duh ïa ki jaka, hynrei ka shu ai wai (lease system), bad ynda la kut ka por ba la ïakut-ïateh, ka jaka kan dei hi ka jong ki khun ka Elaka.
Nalorkata, u la ong hadien ba la kut katei ka por ba la buh da ka Elaka, ka Elaka kan peit shwa lada ka ibiang kan pynthymmai bad lada kam i biang ka Elaka ka lah ban pynduh pyndam noh.
U la ïathuh ba ka jingïakut ka Elaka bad ka Shree Cement Limited ban seng karkhana hapoh ka Elaka, ha kaba sdang ka jingthmu, ka long ban wanrah ïa ka roi ka par kaba dei kaba hakhmat duh, khnang ba ki khun ki kti ka elaka kin ïoh kam ïoh jam, khamtam ha kane ka juk ba hiran ka ïoh kam ïoh jam ki khun samla.
Shibun ki khun samla jong ka Elaka kiba pyndep ïa ka jingpule ba kham shajrong ruh ki shu shong sngi, hap ban pyndap da ki kmie ki kpa bad dei halor kane ka nongrim ka Elaka ka pdiang ïa ka Shree Cement Limited ban ai kam ïa ki samla kiba la biang ka jingpule, la ong u Ma Fencing bad pyntip ruh ba kum ki kam supply bad kiwei kiwei ki kam kiba ki trai Elaka ki lah ban trei, ka kompeni kan ai shwa ïa ki briew jong ka elaka.
Katba na ka liang ki trai jaka ba la kren da u Ma Khrehbha Sukhlain, u la aikhublei ïa ka jingïalam ba stad jong ka Elaka kaba la lah ban wanrah ïa kane ka karkhana pynmih dewbilat na ka bynta ka roi ka par hapoh elaka bad ba ki khun ki kti jong ka elaka kin ïoh kam ïoh jam.
