Shillong, Jymmang 17
Ka long shisha ka khubor kaba sngewsih ban tip ba ka samla Khasi kaba shah jrong kti ha u bar jylla uba dei u nongshna phlim Telugu, South Indian ha ka por ringdur sha Sohra ka la pynpaw ba ka dang sngewrit mynsiem haduh mynta namar wat ki paralok kiba jan ki la kiar lut ïa ka.
Kane ka la pynpaw ha ki nongïalam ka seng ki nongpynmih phlim Khasi ka Meghalaya Film Maker’s Association ha jingïalam u Bah Commander Shangpliang kum President bad Bah Lansius Syiemlieh kum Vice President kiba la leit ïakynduh kyrpang ïa kane ka samla ha Sohra ha jingïadonlang u dkhot KSU South Khasi Hills kaba la long ha ka 16 tarik Jymmang, 2026.
Ka jingïakynduh ki nongïalam ka MeFilma ïa kane ka samla ka long ban kyrshan haba ka mad ïa kane ka jingsngewsih haba ka la shah jrongkti ha u bar jylla uba shim kabu ha ka por ba riehslap.
Kane ka samla ka la pynpaw ba ka la mad ka jingsngewsih namar ki para ba ak phlim lang ki la peit lut haba ka la bteng biang ha kawei ka sngi ban pyndep ïa ka kam ak phlim dei ha kane ka por ka la hap mih noh na jaka ring phlim namar ka jingsngew lehrain. Ka la ïathuh ba mynta ka la long marwei namar ki paralok ba ïajan ruh ki la kiar lut.
Kaba sngewsynei ïa kane ka samla ka long ba kam ju ïoh thiah ha ka por mynmiet namar ka pyrkhat palat.
Ha kane ka sngi ki nongïalam ka MeFilMA ki la leit ïakynduh ïa ki pulit ka thanad Sohra ban buddien ïa ka ejahar ba la ujor kane ka samla.
Haba ïakren bad u Bah Commander Shangpliang u la ïathuh ba na ka liang ka seng ki nongpynmih phlim Khasi ki la wan ïakynduh ïa katei ka khynnah ha Sohra.
U la ïathuh ha kane ka jingïakynduh, ka seng ka la ai mynsiem bad pyntngen ïa kane ka samla kaba don mynta hapdeng ka jingsngewsih naduh ba ka la ngat ha katei ka jingjia.
Ha kajuh ka por ka seng ka la leit ïakynduh ïa ka Investigating Officer ka thanad Sohra ban buddien ïa ka ejahar ba la dep buh da kane ka samla.
U la ïathuh ba ki pulit ruh ki la dep tohkit bad ka seng ka shaniah ha ka jingtohkit ki pulit.
Katkum ka jingïathuh kane ka samla, ka dei ha ka 10 tarik mynta u bnai Jymmang ha ka por janmiet haba la wan u slap, u director u bthah ban ïaid beit ban ringdur namar kat dang hap u slap ka dang itynnad dei ha kane ka por ka la leit riehslap ha kawei ka jaka bad hangta ka jaka u bar jylla u la ïeng lang bad hangne u la sdang ban jrongkti ïa kane ka samla Khasi.
