Shillong, Jymmang 17
Na ka jingmih ki jingkynthoh halor ka jingpynlong ka Voice of The People Party (VPP) ïa ka jingïalang pynsngew paidbah halor ki phra tylli ki mat, kaba ka la buh hakhmat ka Sorkar MDA-2, kaba lam khmat da ka National People’s Party (NPP), na ka liang u Bah Ardent u la pynshai halor kane ka bynta.
Ka jingpynshai u Bah Ardent ka la mih haba u ai jingkren ha ka jingïalang kaba la pynlong ha Bhoirymbong, ha kaba u la ong, ba ka jingmih ka VPP kadei namar ki dawbah kiba kyrkieh, khnang ba ki nongïalam kiba shong ha Secretariat kin sngewthuh ïa ka jingeh kaba ki samla, ki nonghikai, kiba shong ha jaka khappud ki ïa kynduh.
U la ong ba na ki phra tylli ki mat kiba ka party ka la buh hakhmat, ki la nang mih shuh-shuh ki mat, kiba la pynsngew da ki paidbah, kata naduh ka jingeh kiba tih dewïong, ka jingshah knieh nongñiah kali kamai ka jylla ha ki bar jylla, ka jingbym ïoh tulop ki home guard, nalor kiwei-kiwei pat.
“Kaei kaba ka VPP ka shim bad byrngem ban ker tawiar ïa ka Secretariat, kam dei kaba ngin shu leit ker tawiar khlem nongrim, hynrei kidon ki daw bah kiba kyrkieh bad kiba donkam khnang ba kiba shong ha Secretariat kin sngewthuh,” la ong u Bah Ardent.
Ka party ka la pynlong ïa ki jingïalang kum shi bynta ban pynkhreh ïa ka jingthmu leit tur sha Secretariat. “Ka jingïalang ba la long ha Motphran dangshen, ka VPP ka la pynkreh 8 tylli ki mat hynrei mynta la don kiba wan ong, ban kynthup lang lem ha ka mat, ka jingeh haba ïadei bad ka tih dewïong, ka jingtih maw tih shyiap bad kiwei kiwei de ki mat,”u la bynrap.
