Shillong, Jymmang 17
Ka phlim Telegu, kaba na Andhra Pradesh kaba la wan ringdur haduh 80 percent sha Meghalaya ka la ïoh ban shna ïa kawei ka jingrwai shaphang ka Meghalaya kaba la ringdur sha kawei ka jaka jngohkai pyrthei kaba khot Arwah kaba don ha Sohra.
Ha kane ka jingrwai ki don da ki spah ngut ki samla Khasi kiba shad lang bad ki tyngshop bad puron na Telegu.
Katkum ka jingïoh lum jingtip, kane ka phlim kaba dang ïaid ban ringdur sha Meghalaya ka bym pat jer kyrteng ka don haduh saw tylli ki jingrwai kiba la wan ringdur sha Sohra bad Khyndailad.
Ki khubor ki ïathuh ba kane ka phlim ka dei shaphang ki samla pule na Andhra Pradesh kiba wan poi sha Meghalaya namar ki jah lynti.
Kane ka phlim kaba la wan ban ringdur ban kyntiew ïa ka kam jngohkai pyrthei sha Meghalaya hynrei u trai jong kane ka phlim u mad ka jingsngewsih namar u ‘art director’ uba kyrteng u Rajkumar Gipson u la jrongkti ïa ka samla Khasi ha ka 11 tarik Jymmang katba dang riehslap ha por ba ringdur ïa kane ka jingrwai ha Arwah Sohra.
Na ka liang ki nongpynmih phlim Khasi kata ka Meghalaya Film Maker’s Association ki la leit ban ïakynduh ïa u trai jong kane ka phlim uba kyrteng u Rajeev Reddy.
Na ka liang ki pulit ka Sohra ki la dep shim jingkylli ïa une u briew ba jrongkti ïa ka samla Khasi bad ki pulit kin sa leh ïa kaba donkam.
