Shillong, Nailar 11
Ar ngut ki MLA barim jong ka National People’s Party (NPP) kiba la shah rem ha ar ngut ki MLA jong ka Congress kim shym la kwah ban kren eiei halor ka jingpynkhreh jong kine MLA Congress ban rung sha ka seng NPP.
Kine ar ngut MLA barim ki long u Bah Jason Mawlong na Umsning Constituency, Ribhoi District bad u Bah Macmillan Byrsat na Nongstoiñ constituency, West Khasi Hills District.
Katba, ar ngut ki MLA Congress kiba la jop ha ka ilekshon MLA ha u snem 2023 kata u Bah Gabriel Wahlang na Nongstoiñ constituency bad Dr. Celestine Lyngdoh na Umsning constituency ki la pynkhreh ban rung noh sha ka seng NPP ryngkat u Bah Charles Marngar kum MLA ka Mawhati constituency.
Haba u nongthoh khubor u la pyrshang ban ïakren ïa u Bah Macmillan Byrsat na Nongstoiñ bad Bah Jason Mawlong na Umsning kim shym la treh ban kren eiei namar ki ai daw ba ki dang bunkam.
Ki khubor ki ïathuh ba shisien kine lai ngut ki MLA Congress kin rung sha ka seng NPP kaba mut kine ki MLA barim (Bah Macmillan bad Bah Jason) kin hap ban shah pynhiar shuki na ki kam ba ki bat ha ka seng NPP namar ïa ka bor yn aiti beit sha ki MLA kumba la leh ha kine ki snem ba la dep.
Haduh mynta kine lai ngut ki MLA Congress kiba la shah kynnoh ba kin rung noh sha ka seng NPP ym pat don tang uwei ban mih shakhmat ban kren sha ki lad pathai khubor la kane ka jingmih khubor ka dei kaba shisha ne kaba shu suba. Hynrei ki khubor kiba thikna ba ka jingthmu ban rung jong ki sha ka NPP ka la thikna tangba ki ap satang ïa ka por.
Kum ban shu pynkynmaw, u Bah Jason Mawlong, MLA barim ka PDF uba la rung sha ka seng NPP ban ïakhun ïa ka ilekshon MLA na Umsning hynrei u la shah pynliem ha u kyrtong ka Congress u Dr. C. Lyngdoh.
Katba, u Bah Macmillan Byrsat, MLA barim ka NPP u la shah pynliem noh ha u kyrtong ka Congress Bah Gabriel Wahlang.
Napdeng saw ngut ki MLA ka Congress u ban sah marwei dei satang u Bah R.V Lyngdoh, MLA ka Mylliem constituency bad uba dei ruh u nongïalam ka liang pyrshah ha ïingdorbar thawaiñ.
Ki khubor kiba jan ki ïathuh ba ka jingrung NPP kine ki lai ngut ki MLA Congress ka dei namar kim kwah ba kum ki MLA kin shong ha ka liang pyrshah ha ïingdorbar thawaiñ, katba ha Khasi Hills Autonomous District Council (KHADC) kin shong ha ka liang synshar.
Nangta la kynnoh ruh ba kane ka jingrung ki MLA ka Congress sha ka NPP ka dei namar u President ka MPCC ba mynta u Bah Vincent H Pala u don jingïadei kaba jan bad ki nongïalam ka NPP.
