Shillong, Nailar 19
Ki lai ngut ki MLA kiba la pynïasoh pura ïa lade sha ka National People’s Party (NPP) ki la ai ka jingïaroh ïa ka NPP halor ka jinglah jong ka ban trei bad pyni ïa ki kam lyngba ki projek kiba bun kiba ka la wanrah bad pyntrei ha kylleng bad kumjuh ruh ha ki constituency kaba ki mihkhmat.
Hadien ba la pynïasoh sha ka NPP bad haba ai jingkren ha ka jingïalang pdïang burom ïa ki, kine ki MLA ki la ong ba ka jingpynïasoh sha ka NPP, ka dei halor ka nongrim jong ka jinglah jong kane ka seng ban wanrah bad trei ïa ki kam pynroi na ka bynta ka bit ka bïang jong ki shnong ki thaw ha ki constituency bapher bapher.
U Bah Charles Marngar, MLA ka Mawhati u la ong, “Ngi don hangne ban shakri, hato u Bah Charles um ieit ïa ka jaitbynriew, lada don ha ka NPP hato ong bym ieid jaitbynriew. Ym pat don uwei ruh u MLA ka Mawhati ban leit hi dalade sha khappud ka Karbi Anglong bad dei tang ma nga, ha kaba nga la leit haduh ar sien kynthih ban peit ïa ki jingeh jong ki paidbah.”
“Peit ïa ki kam kiba la trei, bad na ka bynta ka constituency nga don ka jingkyrmen ba ka jingrung jong nga sha ka NPP kan dei ka jingkyrkhu ïa ka Mawhati Constituency. Ngam shym la rai marwei ban rung sha ka NPP hynrei nga la rai ryngkat bad u paidbah da ki hajar bad da kawei ka sur,” la ong u Bah Charles.
Katba u MLA ka Nongstoiñ u Bah Gabriel Wahlang u la ong, “Ngam shym la rung sha ka NPP na ka bynta ka jingmyntoi shimet hynrei na ka bynta ka constituency bad nga ngeit ba u Myntri Rangbah un sa shimkhia halor ka roi ka par jong ka constituency.
“Nga sngew kan long ka pop lada ngan shu ai daw ba ngam lah ban leh eiei na ka bynta u paidbah bad ka constituency naba nga don ha Liang Pyrshah, hynrei ngi dei ban sngewthuh ban ïoh ïa ka roi ka par ha kino kino ki constituency, ngi donkam beit ban ïoh ïa ka Sorkar,” la ong u Bah Gabriel bad bynrap, “Ai ba ki briew kin beiñ bad kren kat kaba ki kren ïa ka jingïasnoh jong nga bad ka NPP kampher namar nga rung na ka bynta ka jingmyntoi ka constituency bad ka rai ruh kam dei ba la shim shimet hynrei ryngkat lang bad ki spah ngut ki nongkyrshan jong nga.”
Kumjuh ruh u MLA ka Umsning u Dr Celestine Lyngdoh u la ong, kum u nongmihkhmat u hap ban jied ïa kano kano ka lynti kaba ai ka jingmyntoi bad kaba bha tam na ka bynta u paidbah ka constituency.
“Ka don ka kyntien kaba ong, leit na ti mih ha ti, leit na ti ruh mih ha ti, kumta kum ki nongïalam ngi hap ban peit ïa ka surok kaba bïang bad ai ïa ka babha tam ïa u paidbah,” u la ong bad bynrap, “Nga la jied ïa kane ka lynti na ka bynta ka jingmyntoi ki paidbah kiba la jied ban wanrah jingkylla bad nga kyrmen skhem ba ka jingkylla kan sa wan.”
Une u MLA ka Umsning u la ong, “Ka NPP mynta ka la don ïa u ‘magic number’ bad kumta kane ka number kan ai mynsiem bad jingshaniah ha ka sorkar ba kan shim ïa kano kano ka rai na ka bynta ka bit ka biang jong ka jylla hi baroh kawei.”
