Jowai, Nailar 19
Uwei u karikor (Engineer) uba khmih ïa ka shlem pynmih bording Lakroh Mini Hydel Project kaba don ha Pachum, Lakroh ula shah bat ha ka bording ha ka por ba u dang jurip ïa kawei na ki bynta jong kane ka shlem ba la tip kum ka ‘Strong Room’.
Kane ka jingjia kala jia ha ka step Lah Sngi U Blei ha ka por kumba 7 baje eiei.
Ïa une u karikor la tip kyrteng kum u Eddy Kerry Pohtam bad mynta u don hapdeng ka jingshah sumar ha Bethany Hospital, Shillong.
Haba ïakren bad u Kñi jong une u karikor, u Bah Lop Pohtam, u la ïathuh ba hadien kane ka jingjia, mar-mar la pynkit ïa u Eddy, hynrei ka jingbym lait kali sha kane ka jaka pynmih bording ka la shim por ban kit ïa u namarba hap ban kit da ki briew haduh ha surok ba pynïasoh ïa ka Lakroh bad ka Muktapur.
U la ïathuh ruh ba u la pan jingïarap na ki shipai BSF kiba la pynpoi ïa ka Ambulance ha Lakroh bad kit sha Pdengshakap ban ïoh jingsumar, hynrei haba poi ha kane ka jaka ruh, kaba sngewsih ka long ba ym don doktor ban ai wat ïa ka jingsumar kaba malu mala (first aid). Kumta la pynkit ïa u Eddy sha Bethany Hospital Shillong.
U Bah Lop Pohtam u la pynpaw ïa ka jingsngewsih halor kane ka jingjia bad u la buh jingkylli kumno ka tnad MeECL/MePGCL ka treikam haba tang ka surok ban leit sha ‘Power House’, ka tnad kam lah ban shna. U la ong baroh shikatta ki karikor bad ki nongtrei ka MeECL ki hap ban ïaid da ka kjat hapdeng ka ktieh bad ka umsaw ha ka aïom slap kaba bym don satia ka jingshngaiñ ïa ki nongtrei kane ka tnad.
U la dawa na ka MeECL ban pynbeit mardor ïa kane bad ban pynthikna ba kum kine ki jingjia kim dei ban jia hadien habud.
Kane ka jaka pynmih bording ka MPGCL ka dei kaba shongdor T. 21.43 Klur. La bei pisa na ka Ministry of New and Renewable Energy, Government of India (MNRE) kaba la kot sha ka T.6.75 klur bad na ka North Eastern Council (NEC) T. 5 klur, bad ïa kaba duna la hap ban buria da ka tnad kaba long T. 9.68 klur. Ka la sdang ban treikam naduh u snem 2019 bad pynmih ïa ka bording kaba 1.5 Megawatt.
