Shillong, Naiwieng 02
Ka Shad Nongkrem kaba dei ka shad tynrai ki Khasi, ha ka 02 tarik u Naiwieng 2026, ka la kut noh da ka jingkmen bad ha ryngkat ka jingiphuh iphieng kaba la long ha Ïingsad kaba don ha Smit.
Kane ka shad lehniam, la ju pynlong shisien ha ka shi snem bad la pynlong kum shibynta ban ainguh ïa ka Lei Synshar ban ïoh ka jingkyrkhu ha ka rep ka riang bad ka bit ka biang jong ki paidbah.
U Syiem ka Hima Khyrim ryngkat bad ki Lyngdoh ki la pyndep ïa ka lehniam Pomblang, ha kaba la pom ïa u Blang kum shibynta jong ka jingainguh ïa u Lei Shyllong bad kumjuh ruh ïa ki longshuwa manshuwa na ka Kur, kaba la ïalam ïa ka jingsynshar.
Ha kane ka jingshad lehniam, kadei da ka jingshim bynta ki thei sotti, kiba la mih bad la ki riam tynrai ba itynnad bad iphuh ha ka lympung ïashad ha kane ka sngi kaba kyrpang.
Ym tang ki thei sotti, hynrei ki samla shynrang ruh ki la ïa shimbynlang ha ka jingshad ha Ïingsad, ha ryngkat ka jingbat ïa ki waitlam bad u Symphiah, da kaba pynleit jingmut bad shahshkor ruh ïa ka jingsawa kaba mih na ki ksing bad ki tangmuri.
Ha kane ka jingshad, la sakhi ïa ka jingwan ki paidbah na kylleng ka Jylla bad ka jingdon ruh ki dukan shabar ka Ïingsad kaba la nangpynphuh shuh shuh ïa ka jingshad lehniam.
Ki paidbah kiba la leit ban sakhi ha kane ka jingshad lehniam tynrai ha Smit, ki la riam ryngkat ki riam tynrai kiba la pynitynnad bha.
Ha kane ka sngi, la don ruh ka jingpyninam ïa ki jingthaiñ kti bapher-bapher bad ïa ki jingbam bapher-bapher ha kane ka jingrakhe bad jinglehniam kaba shisien ha ka shi snem.
