Shillong, Naiwieng 02
U Myntri Rangbah ka Jylla Conrad K. Sangma u la ong ba ki jingïakhih pyrshah ïa ka Shillong Ropeway Project ka long kaba sngewsih namar ïa baroh ki mat jingsngew-khia ba la pynsngew ki dei kiba la dep pynshai bad kdew ba ka jingpyrshah ïa ka projek kan ktah ïa ka lad ïohkam ïohjam ki samla ka Jylla.
“Ka long kaba sngewsih. Ki don ki jingsngewkhia ba la pynsngew da ki katto katne ki seng bad ki riew shimet bad ka tnad ka la pynshai jan baroh ki bynta. Ka jingsngewkhia jong nga ïa mynta ka long ban tip ïa kiei kita ki jingsngewkhia bad lada don ki jingeh kiba sngewdei shisha, ngi dei ban ïakren bad pynbeit ïa ki” la ong u Conrad.
U la ong ba ïa ki jingsngewkhia kiba dei hok shisha dei ban kyrshan lang bad ki nongrim. “Phi hap ban kyrshan ïa ki jingsngewkhia jong phi da ki nongrim kiba dei hok bad kumta lada don kano-kano ka jingeh bad lada dei kiba dei hok, ngin sa ïakren ïa ki, ngim don jingeh ban leh ïa kata” u la ong.
U Conrad u ong ba kane ka projek ka dei kaba la dep bishar bniah da ki Agency ba shemphang halor kane ka kam mynta la arsnem. “Ngi la pynlut jan arsnem shiteng halor kane ka projek bad baroh ki Agency ba don bynta ha ka jingbishar ïa ki kam Technical, ki dei ki Agency kiba la shemphang bha bad baroh ki bynta bapher-bapher ba ïadei bad ka mariang bad kiwei-kiwei la dep ban pynbeit. Kumta kam don daw satia ban nangmih kano-kano ka jingeh” u la ong.
“Haba mih ka jingpynsngew ïa ki jingsngewkhia, ka Commissioner & Secretary ka tnad Jngohkai bad Industries ka la ai jingpynshai, kumjuh ruh na ka MTDC bad u MD jong ngi ruh u la pynshai ïa baroh ki mat bad ki ruh kila pdiang, ngi la ïohi ïa ki jingpynshai bad ki jingpynshai ki long kiba shai bha. Kumta, ngam ïohi balei ba dei ban pynsangeh mynta bad namar ïa ki jingsngewkhia la dep ban pynbeit, ngi dei ban pynïaid shakhmat ïa ka kam” u la bynrap.
Haba ban jur halor ka jingthaw ïa ka lad ïohkam ïohjam, u Myntri Rangbah u la ong “Baroh ngi ïakren halor ka jingthaw ïa ki lad ïohkam ïohjam bad ujor ba duna eh ka ïohkam ïohjam ki samla jong ngi. Balei ba ngi pyntrei ïa kane ka projek?. Kane ka projek kan kyntiew ïa ka kam jngohkai sha kawei pat ka kyrdan bad ki kabu ki ban mih na ka kin dei kiba bun bha, kin don da ki spah, wat da ki hajar na ki samla ki ban ïohkam na ka projek bad da ki hajar kin ïoh lyngba kiwei pat ki kam”.
Kumta lada pyrshah ïa kane, ka la ktah ïa ka kamai jakpoh bad ka lad ïohkam ïohjam jong ki samla ka Jylla. “Ngi hap ban kynmaw ïa kane. Lada don ka jingsngewkhia halor ka mariang, ngi long kiba kloi ban ïakren bad pynbeit ïa kine ki jingsngewkhia, hynrei katkum ka jingtip jong nga bad ki jingbatai ba la ai, kam don satia kum kane ka jingeh” la ong u Conrad.
“Ngi la duh ïa ka lad aikam aijam, kaba dei kawei na ki bynta ba kongsan bha bad ki daw balei ba ngi kyntu ïa kane ka projek. Kumta kane kan ktah ïa ki samla jong ngi bad ngi dei ban sngewthuh ba ki samla ki long kiba kongsan ïa ngi.” u Conrad u la ong ba kiba pyrshah ïa ka projek ki la pyrshah ïa ka lad kamai jakpoh kaba ki samla kin ïoh na kane ka projek. “Ngi hap ban pyrkhat ïa kine kiei-kiei baroh haba ngi jam shakhmat” u la ong.
Halor ba mih kane ka jingpyrshah, u Conrad u la ong “Kane kam dei ka kam kaba ngi dang sdang. Ki kam jong ka projek ki la ïaid la arsnem shiteng, lada don ki jingsngewkhia kiba khraw, ki la dei ban pynsngew naduh mynno, hynrei kat kaba dei ka daw, ki la rai ban ym leh ïa kata, hynrei syndet-syndet ynda la dei ban aiti ïa ka projek ban pyntrei, ki la mih ban pyrshah. Kaei kaba kongsan ïa ngi ka long ban pynbeit ïa ki jingeh shakhmat, peit ba ka projek kan dep bad pynthikna ba kan aikam aijam ïa ki samla jong ngi” u la ong.
Ka jingleit khang ki ophisar ka KHADC ïa katei ka projek, u Conrad u la ong “Ngi la bud ïa ki kyndon bad ki aiñ bad kano-kano ka sienjam kaba dei ban shim ngin sa shim. Kat kiba dei ki ophisar na ka KHADC, kiba la leit bad leh ïa kane, haba pynshong nongrim ïa ki kyndon ka aiñ, ka Jylla kan leh ïa kaba donkam bad ka aiñ kan shim la ka jong ka lynti”.
