Shillong, Naiwieng 02
U President ka Hill State People’s Democratic Party (HSPDP) Bah K.P Pangniang u la pynpaw ïa ka jingsngewdiaw haba u Bah Metbah Lyngdoh, u la sah sa tang marwei kum u MLA ha ka UDP hadien ba ki 11 ngut ki MLA ki la kynthih noh sha kiwei pat ki seng saiñpyrthei.
U Bah Pangniang u la ong ba donkam ïa ki MLA kiba jop ha ki seng riewlum ba kin don ïa ka nongrim kaba skhem.
Haba kylli ka don ne em ka jingshah pynbor ban phah hiar shuki Myntri ïa ka HSPDP, u Bah Pangniang u la ong ba haduh mynta ym pat don eiei ka jingïakren ne ym pat ïoh sngew eiei.
U la ong biang ba halor ka jinghiar shuki u Bah Metbah Lyngdoh kum u Myntri haba u la sah marwei um lah ban ong eiei namar ka dei ka kam ïing kam sem jong ka UDP. U la ïathuh ba ka UDP bad HSPDP ki dang don haduh mynta ha ka RDA.
U Bah Pangniang u la ïathuh ba ka seng ka don bynta ha ka Sorkar ka dei halor ki mat ki jura jong ka jaidbynriew ba kan ïoh ban ïakren bad ïatai khamtam ban pynbeit ïa u pud u sam, ban pyrshah tih uranium ban pynrung ïa ka ktien Khasi ha ka khyrnit kaba phra.
Shuh shuh u la ong biang ba ka HSPDP kan sa rakhe ïa ka jingdap 60 snem ka jingïaid lynti jong ka ha u snem 2028 hynrei haduh mynta ki nongrim jong ka seng ki dang skhem beit.
Kumban shu pynkynmaw ha kine ki bnai ba la dep haba ki phra ngut ki MLA ka UDP ki la leit ban pynïasoh sha ka BJP ki la pynpaw ba ki kwah ban pynrung Myntri ïa ki ar ngut ha ka Sorkar MDA-2.
Ki khubor ki ïathuh ba ha jaka jong kine ki ar ngut ki MLA BJP ba dang shu rung la ai jingmut ban weng noh ïa u Bah Metbah Lyngdoh na ka UDP bad ïa ka bhah jong ka HSPDP hynrei ha ka 31 tarik Risaw pat u Bah Metbah Lyngdoh u la hiar shuki hi noh namar ba u la sah sa tang marwei.
