Shillong, Nailar 20
Ka ïingbishar jong ka District & Sessions Judge ha ka sngi Ba-Ar ka la pynmih ka hukum ban set 14 sngi ïa u Shambu Sharma hapoh ka Judicial Custody ban tohkit halor ka jingkynnoh ba u la donkti ban leh khlem akor ïa la ka para nongtrei kaba dang 23 snem ka rta.
U Shambu uba trei kum u Cashier hapoh ka North Eastern Council (NEC) u la shah kem noh ha ki pulit ha ka miet Lah Sngi U Blei halor ka jingkynnoh ba u la jrong kti bad thmu leh khlem akor ïa ka para nongtrei kaba trei ‘Casual’ ha NEC ha ka ïing (quarters) kaba u sah ha Motinagar ha ka por kumba 1:30 eiei mynsngi.
Hadien ba la ïoh jingujor halor kane, ki pulit ka Laitumkhrah ki la pynrung ïa ka jingujor hapoh ki kyndon kiba bun jong ka Bharatiya Nyaya Sanhita (BNS).
Halor kane ka jingjia, u Superintendent of Police (SP) ka East Khasi Hills, u Bah Sylvester Nongtnger, haba kren sha ki lad pathai khubor u la ong ba ki la ïoh pdiang ïa ka jingtip ha ka por janmiet ba ka don ka jingkynnoh leh khlemakor ïa kawei ka nongtrei NEC.
U SP u la pyntip ba mar-mar la bthah ïa ki pulit ka Laitumkhrah ban leit sha NEC bad pynlong ïa ka jingtohkit. La ong ba na ka liang jong u Officer-in-Charge ka Laitumkhrah ruh u la wan ïalam noh ïa u briew ba shah kynnoh bad ka briew ba shah leh khlem akor sha thanad bad hadien kata la phah noh ïa kane ka samla ban leit phah peit ha ki doktor, bad hadien kane la pynrung da ka jingujor pyrshah ïa une u briew.
Ha kawei pat ka liang, haba ïathuh bniah halor kane ka jingjia, ka para jong ka kmie katei ka samla kaba la kynnoh shah leh khlem akor, haba kren sha ki lad pathai khubor, ka la pyntip ba u Shambu u la bthah ïa katei ka samla ba kan hap ban leit sha bank ha ka por ba la jan dei artad ka por bam ja sngi.
Ka la ïathuh ba katei ka samla ka la pyrkhat ba kin hap ban leit da ka kali jong ka shlem treikam sha Bank, hynrei na ka liang u Shambu u la ong ïa ka, ba kin leit sha Bank da ka kali shimet ka jong u.Hadien ba la mih na shlem treikam, ha ka jaka ban leit sha Bank, u la ong ban leit shwa sha ka jaka sah jong u kaba don ha Motinagar, ban leit shim ïa ka ‘tiffin box’.
Ka la ong ba hadien ba la poi sha ka jaka sah, u Shambu u la ong ïa katei ka samla ban rung shapoh ka jaka sah, hynrei wat hadien ba ka la kyntait ban rung, hynrei u la pynbor ba ka dei ban dih sha. Kata ka samla ruh, khlem da suba sniew eiei, ka la rung sha kata ka ïing sah,hynrei dei ynda ka la don hapoh ïing ba la kynnoh ba u Shambu u la sdang ban leh jubor.
Ka para jong ka kmie katei ka samla ka la kynnoh ruh ba hadien ba u Shambu u la leh khlem akor ïa katei ka samla, u la ïalam kai ïa ka sha ka surok Shillong-Jowai bad hadien katto katne por, u la phai noh ban wan biang sha nongbah Shillong.
“Hadien ba la rung sha nongbah Shillong, une u briew u la bteng ban pynshang kylleng ka nongbah bad u sa leit pynhiar pat sha shlem treikam ynda la khreh dum ka bneng,” ka la ïathuh.
Kane ka para jong ka kmie katei ka samla ka la ïathuh ba kane ka samla ka la ud ba ka don ka jingpang ha ka bynta ba shadien jong ka ryndang hadien ba utei u briew u la shoh ïa ka.
Ka la ong ba ki la dep ban ujor da ka ejahar ha ka miet Lah Sngi U Blei hadien ba ki la ïoh jingtip halor katei ka jingjia.
Ka la ïathuh ba ïa kane samla, la thung ha NEC ha ka jaka jong u kpa jong ka, hadien ba u la khlad noh. Kane ka samla ka la trei mynta la palat 1 snem ha NEC.
