Shillong, Lber 02
Ka Khasi Students’ Union (KSU) North Khasi Hills Eastern Border Area, ha ka 02 tarik u Lber 2026, ka la leit beh mardor ïa u wei u bar jylla u ba kam ïalade kum u doktor uba tip kyrteng kum u Syed Nazir Shah bad u buh ruh ïa ka dukan clinic ba khlem don ki signboard bad ki kot ki sla ki bym biang ha ka shnong Umraling kaba hap hapoh ka Mawlasnai Police Outpost.
Ka seng tang shu ïoh jingtip halor kane, ka la hiar mardor ha katei ka shnong Umraling hapoh ka jingïalam u Samla Banjop Maring, President KSU Eastern Border Area, u Samla Augustin Shadap Assistant Education Eastern Border Area, ha kaba ka la lap shisha ba don u bar jylla u ba kam ïalade kum u doktor bad u buh ruh ïa ka dukan clinic bad ha katei ka clinic u ai injection bad ki drip ïa ki paidbah kiba wan shim dawai ha katei ka jaka.
Katei ka clinic ka long kaba isaitmet bad peit ha kaba ka kamra sumar bad ka jaka shet ka long ha kajuh ka kamra bad kaba jakhlia haduh katta-katta bad ka seng ka sngew lyngngoh kadei ba wat ïa ki thyrnia injection kiba la dep ban pyndonkam u buh ha kajuh ka kamra bad lada kylli ïa u shaei u bret ïa ki thyrnia u jubab ba u ai ïa ki nongtam tin jot.
Kumta mar-mar na ka liang ka seng ka la beh mardor ïa u tei u bar jylla ba kam ïalade kum u Doktor bad aiti noh ruh sha ka Thanad jong ka Mawlasnai Outpost.
Kumta ka seng ka la kyntu ruh ïa ki shnong bad ki nongïalam shnong bapher-bapher, ba kin nym dei ban ailad ïa kum kine ki jaitbriew khamtam kaba ïadei bad ka im ka ïap jong ka jaitbynriew.
