Shillong, Lber 02
U Myntri Sorkar Pdeng ka tnad Social Justice & Empowerment, u Dr. Virendra Kumar ha ka Lah Sngi U Blei u la ong ba ka Sorkar Pdeng ka ïatreilang bad ka Meghalaya ban khmih ïa ki jingeh kiba ïadei bad u ‘Aadhaar’, ha kawei ka liang kaba ktah ïa ka jingpynpoi ïa ki skhim sha kane ka Jylla.
Haba kren hadien ba pynïaid ïa ka jingïalang khmih bniah ha Tara Ghar, u Myntri u la kdew ba ka jingpynïasoh ‘Aadhaar’ ka ïaid ha ka ri baroh kawei, hynrei “ki jingbym biang bad ki jingeh” ka paw ha ki bynta jong ka Meghalaya.
“Ngi la ïakren bad ka tnad kumno ban pynbeit ïa kane…khnang ba ka jingpyntreikam kan ïaid beit ïaid ryntih ha ka por ba la buh,” u la ong da kaba bynrap ba ki skhim ha baroh kawei ka ri ki thmu ban pyntreikam mar katjuh bad ki jingeh ba kyrpang jong ki Jylla la shimkhia na ka bynta ki lad jingpynbeit kiba treikam.
Ki ophisar ki la pynpaw ha ka jingïalang ba ka jingpynïasoh ‘Aadhaar’ ha Meghalaya ka sahdien haba nujor bad ka jingkheiñ ha ka ri baroh kawei; katto-katne ki nongïoh jingmyntoi ki kyntait ban pynrung kyrteng, katba kiwei pat kim lah ban pynthymmai ïa ki jingtip ba bniah namarba ki OTP ki leit sha ki SIM ki bym treikam.
Ki tnad treikam ki la ïathuh ruh ba ki jingpynsngewthuh paidbah bad ki jingpynrung kyrteng na ka liang ki ophisar ka distrik ki dang ïaid shakhmat.
Ha kane ka sngi, la ïadonlang ruh u Adviser, Bah Paul Lyngdoh, Deputy Commissioner, Kong R.M. Kurbah bad ki ophisar jong ka tnad ba dei khmih.
Shuh shuh u Kumar u la ong ba ki jingbatai bniah ki kynthup ïa ka PMAY, PMGSY bad kiwei-kiwei ki prokram ha East Khasi Hills, bad u la leit ruh ban jngoh ïa ki skul, ka shlem sumar khynnah bad ka jaka ri tymmen.
Kane ka jingwan jngoh ka dei shi bynta jong ka jingkhmih bniah ba man ka por jong ki Myntri Sorkar Pdeng ïa ka Thaiñ Shatei Lam Mihngi.
