Shillong, Lber 02
Ka bor District jong ka East Khasi Hills District ha ka jingïatreilang bad ka Recruitment Cell jong ki shipai ‘Air Force’ ha ka sngi Nyngkong ki la pynlong ïa ka ‘Awareness Program’ bad ka ‘Career Counselling’ na ka bynta ki samla Khasi kiba thrang ban ïoh long shipai.
Haba ïakren sha ki nongthoh khubor u Viney Kumar u wei na ki shipai uba don bynta ban pynsngewthuh ïa ki samla haba ïadei kumno ban ïoh rung kam shipai, u la ong ba ka ‘Air Force’ ka buh ïa ka thong ban ai kam shipai ïa ki khun samla jong ka Jylla Meghalaya.
Ka jingpynrung kam ka sdang naduh kiba don ha ka rta ba 17 snem shiteng haduh 22 snem ha kaba naduh ka klas 8 haduh klas 12 ki la lah ban thep ha kane ka kam bad ki samla kiba ïoh rung ha kane ka kam kin ïoh shibun ki lad jingmyntoi.
U la ban jur ba ki samla jong ka Megha-laya ki dei ban wan shakhmat ban long shipai bad ka jingthep kyrteng ka la sdang ban plie bad kan dang bteng haduh ka 1 tarik u Ïaiong 2026.
U la pyntip ruh haba ïadei ki samla kynthei kiba don ka jingthrang ban ïoh long shipai, ba ki dei ban leit pynrung kyrteng ïalade ha ka shlem shipai kaba don ha nongbah Shillong khnang ba kin ïoh ïa ka jingai jinghikai.
Ka Deputy Commissioner ka East Khasi Hills ka Kong R.M Kurbah haba ïakren ka la ïathuh ba ïa kane ka ‘Recruitment Drive’ la sdang ban pynlong man la u snem naduh u snem 2023 bad naduh ba sdang ïa kane ka jingai jinghikai ki la don haduh kumba san spah tam ngut ki khun samla kiba la ïoh rung kam ha ka tnad shipai bad dang shen kumba lai spah tam ki samla ki la ïoh rung kam ha ka tnad BSF.
Nalor kata ka Kong Kurbah ka la pynpaw ba ka District baroh kawei ka dap da ka jingsngewkmen ban ïohi ba ki khynnah ki wan shakhmat ban trei na ka bynta ban ïada ïa ka Ri. “Mynta ka sngi ka dei ka ‘Awareness’ bad kumba 900 ngut tam ki khynnah ki la pynrung kyrteng ïalade, Ka long kaba kordor shi kat dei ba dei na ka bynta jong ki ba ngi ïohthiah suk mynmiet bad ngi pynshlur ïa ki samla jong ngi ban pynïasoh ïalade ha ka kam shipai.”
Ka la kitbok kitrwiang ïa ki samla kiba la wan shakhmat bad kyntu ïa kiwei ruh ba kin mih shakhmat ban pynïasoh ïalade ha kane ka kam namar kane ka dei ka lynti ba kin ïoh ban ai jingshakri ïa ka Ri baroh kawei.
Ka la bynrap ruh ba ka Rally na ka bynta ki samla kynthei kan long ha ka 20 tarik u Lber, katba na ka bynta ki samla shynrang kan long ha ka 22 tarik u Lber 2026, kumta ka la kyntu ïa ki samla ba kin peit sha ka website jong ka District na ka bynta kiba bun ki jingtip.
