Shillong, Lber 02
U Symbud Myntri Rangbah ka Jylla ka tnad kam pynroi sor, Bah Sniawbhalang Dhar, u la pyntip ba kumba 1.21 lak ton ka jaboh kaba la lang da ki snem, ka dang sah ban pynkhuid ha ka jaka bret ñiut ha Marten, bad la khmih lynti ban pyndep ïa kane ka kam hapoh u bnai Jylliew, 2026.
Ka jaboh baroh kaba lang ka long 3,45,996MT, ha kaba 2,24,143MT la lah ban pynkhuid noh.
U Myntri u la ong ba ka teknoloji ba la pyndonkam ka ïahap bad ki kyndon sumar mariang jong ka pyrthei bad ym shym la daiñ kuna ïa ki kontraktor.
Ïa ka projek bret ñiut ha Marten la mang pisa haduh T.24.4klur, ha kaba la pynlut T.12.75klur haduh mynta.
Ïa ki tiar ba la pynkhreh na ka ‘Bio-Mining’ la peit bniah na ka bynta ka jinglong bih ha ki ‘Lab’ ba la ithuh da ka NABL, bad la pynbiang ruh ïa ki jingtip ba bniah halor ka jingpynduh/jingpyndonkam biang. Ïa kane ka kam la pyntrei da ka M/s Call & Fix kaba na Guwahati.
U la ong ba ym shym la leh ïa kano-kano ka ‘Environmental Impact Assessment’ bathymmai, naba ïa ka ‘Bio-Mining’ ym kheiñ kum ka projek thymmai hapoh ka aiñ kaba mynta.
U Bah Sniawbha u la jubab ïa ka jingkylli (Unstarred) kaba la wanrah ha ka Dorbar Mang Tyngka kaba dang shu kut shen.
