Shillong, Nailar 29
Ka sorkar Meghalaya ka la phah jingtip sha ka High Commission jong ka sorkar Bangladesh kaba don ha New Delhi halor ka jinglap ïa kawei ka metïap jong u nongshong shnong ka Bangladesh na kawei ka bri kwai kaba don hapoh u pud u sam jong ka East Jaiñtia Hills.
Lah ban pynkynmaw ba hynnin ka sngi, ki pulit ka East Jaiñtia Hills ki la pyntip ba ha ka 26 tarik Nailar, ki la lap ïa kawei ka metïap kaba la pyut malu-mala bad ynda la peit na ka ‘Passport’ ba la don ha kane ka met, la shem ba ka dei jong u briew ba la tip kyrteng kum u Ishaque Ali Khan Panna.
La lap nyngkong ïa katei ka metïap da ki nongshong shnong ka thaiñ Dona Bhoi kaba don ha East Jaiñtia Hills kiba la ai jingtip pat sha ki pulit. Ka jaka ba la lap ïa ka metïap ka dei ka bri kwai bad kaba jngai tang kumba 1.5 km na khappud India-Bangladesh.
U Panna u dei u juh u briew uba ki lad pathai khubor na Bangladesh ha kine ki khyndiat sngi ki la kam ba u la ïap ha Meghalaya hadien ba u la phet na la ka jong ka Ri ban wan sha India. Une u briew u dei u General Secretary barim ka Bangladesh Chhatra League (BCL) bad dkhot ka Pirojpur District Awami League (PDAL).
Ka Awami League ka dei ka seng jong ka Sheikh Hasina kaba la hap ban hair shuki kum ka Myntri Rangbahduh ka Bangladesh ha ka 5 tarik Nailar bad kaba la wan phet sha India.
U SP ka East Jaiñtia Hills, u Giri Prasad, u la ong ba la lap ruh ïa kawei ‘Passport’ Bangladesh kaba don ïa ka kyrteng Ishaque Ali Khan Panna na katei ka metïap.
Hadien kane, ynda la pyndep ïa baroh ki jingdonkam ha ka jaka ba la lap ïa ka metïap, la pynkynriah noh ïa ka met sha Civil Hospital, Khliehriat na ka bynta ban pyndep ïa ka ‘Post-Mortem’.
Shuh shuh u SP u la ong ba hadien ba la pyndep ïa ka ‘Post-Mortem’, la buh ïa ka met ha karma buh metïap (Morgue Room) ha Khliehriat Civil Hospital, East Jaiñtia Hills na bynta ka jingpynithuh bad ban wan kam ïa ka.
Ka jingtohkit halor kane ka dang ïaid shakhmat, la ong utei u heh pulit.
Mynta ka sngi, u Prasad u la ong ba ki pulit ka East Jaiñtia Hills ki la ai da ka ejahar halor ka jinglap ïa katei ka metïap. Nalorkata, u la ong ba lyngba ka sorkar jylla, la ai jingtip sha ka High Commission ka sorkar Bangladesh halor katei ka jingjia khnang ba na ka liang ka High Commission kan ai jingtip pat sha ki bahaïing hasem jong u Panna ba kin wan ban peit ïa katei ka metïap.
