Ka Sorkar kan pynbeit ïa ki jingeh ki nongthoh khubor, hynrei kin trei da ka jingshisha: Conrad

Shillong, Naiwieng 16 U Myntri Rangbah ka Jylla u Conrad K. Sangma ha ka Lah Sngi U Blei u la pynthikna ïa ki nongthoh khubor ba ka Sorkar kan pynbeit ïa ki jingeh kiba la...

Shillong, Naiwieng 16

U Myntri Rangbah ka Jylla u Conrad K. Sangma ha ka Lah Sngi U Blei u la pynthikna ïa ki nongthoh khubor ba ka Sorkar kan pynbeit ïa ki jingeh kiba la kdew ha ka Memoran-dum, ba kynthup ka jingpynheh ïa ka mang tyngka bad ban pynbeit ryntih ïa ka jingsiew ïa ki Advertisement.

Haba kren ha ka jingrakhe ‘National Press Day’ ha Shillong Club, u Conrad u la ong ba ki jingtrei ki la dep ban ïaid. “Ngim lah ban pynbeit lut ïa baroh ki jingeh jong phi, hynrei nga ngeit ba ngi lah ban pynbeit ïa katto katne bad ngin trei halor jong ki” u la ong.

“Ngi sngewkmen ban kyrshan bad pynthikna ïa ka jingbha jingmiat jong ki nongthoh khubor, ka jingpyntbit, ka jingai jinghikai bad ka jingroi baroh kawei ka kam thoh khubor ba kan long ka ba bit ba biang ha ki por ban wan” u la bynrap.

U Conrad u la kyntu ïa ka Shillong Press Club bad ka MEPA ba kin thaw thymmai ïa ka kam thoh khubor ba tbit bad ban pynïapher na kiba pyndonkam ïa ka Social Media ban pynmih ïa ki khubor ba khlem nongrim.

“Phim donkam ban ïanujor ïalade bad ki nongpynmih kano-kano ka khubor ha ki Social Media” la ong u Conrad. “To phai biang sha la ki tynrai bad leh kaei kaba phi leh ha ka jingshisha”

U Myntri Rangbah u la ai jingmut, ka jingdon ki ID jingpynshisha kan long ka jingshaniah ïa ki paidbah

“Nga tharai kane ka dei kaei-kaei kaba phi lah ban leh ha la ka jong ka kyrdan, namar lada phi ïai bteng ban ïaleh pyrshah ïa kaei kaba la don lypa bad kiei-kiei kiba kum kane ka juk, kaba nga ïanujor bad ka kup ka phong, kata kam dei ïa phi. Balei phin kwah ban long kumta? Leit phai biang sha la ki tynrai bad long kumba phi la sdang ha ka jingshisha” u la ong.

“Ka don ka jingduna ïa kita ka jait khubor kiba la jah mynta. Hato phi lah ban trei ïa kata? Phi lah ban thaw ïa kata? Bad katba ngi dang ïaleh bad mareh shadien jong kine ki bynta jong ka teknoloji baroh kiba wan rung, nga pyrkhat ba ngi lah ban thaw ïa kata ka jaka na ka bynta jong ngi” u la bynrap.

U Conrad u la kren ruh haba ïadei ban pynduna ïa ka jingpynlut ïa ka por ha kaba ai jingkren ban pdiang sngewbha bad ban ai khublei ha ki prokram, “Nga la rai ba ha ki prokram jong nga, ban pynlong ïa kine kiba kham sted, kiei-kiei kiba ha ka jingshisha kim don jingmut eiei bad ngi donkam ban sangeh noh ban leh ïa ki tang namar ba la ju leh ïa ki” u la ong.