Shillong, Naiwieng 16
U Myntri ka tnad kam jngohkai pyrthei, u Bah Paul Lyngdoh ha ka Lah Sngi U Blei u la ong ba ka Meghalaya kam dei shuh tang kaba shu pynlong ïa ki tamasa – ka la lamkhmat ïa ka ‘Concert Economy’ ka ri India.
U Bah Lyngdoh u la ong ïa kane katba u dang pynpaw bad kren shaphang ka tamasa ‘Cherry Blossom’ ka ban long mynta u snem ha Madan Kurkalang, Bhoirymbong.
Haba pynkynmaw ïa ka jingpynskhem mynshem snem, u Bah Lyngdoh u la ong ba ka pyrthei ka la dep phai-khmat sha ka nongbah Shillong.
“Nga kwah ba ngi baroh ngin pynkynmaw ba wat hapdeng kiba bun ki nongpyrshah, ha u snem ba la dep, uwei u nongrwai ba pawnam – u Ed Sheeran u la jer kyrteng ïa ka Shillong kum ka jaka ba u sngewtynnad tam na baroh ki hynriew tylli ki nongbah kiba u la leit ban rwai ha India,” u la ong.
U la ong ruh ba ka jingnang kiew jong ka Meghalaya mynta ka la long kum ka nuksa ïa ka ri baroh kawei.
“Ka long ruh ka jingsarong ïa ngi ba hadien ka jingthmu jong ka Meghalaya ha ka ban kyntiew ïa kaei kaba la tip mynta kum ka ‘Concert Economy’, ka ïoh ka kot kaba la don wat mynshuwa, u Myntri Rangbahduh ka ri u la pyndonkam ïa kita ki kyntien, ka ‘Concert Economy’,” u la ong.
“Ngi la ïohi ba ki Jylla ba marjan kum ka Assam ruh ki la ïoh mynsiem ban wanrah ïa ki nongrwai bad ki nongput-nongtem ba pawnam ka pyrthei, bad katba ngi dang ïakren, ka ‘Guns N’ Roses’ ka la pynkhreh ban tem ha Guwahati,” u la ong.
U Bah Lyngdoh u la ong ba ïa ka jingshemphang jong ka Meghalaya mynta la pan jingmut da kiwei pat ki Jylla.
“Ha u snem ba la dep, ka ‘Rockski’ u la ïarap ruh ha kaba pynlong ïa ka ‘Music Fest’ ha Sikkim, bad mynta u snem ngi dang pynïar ïa kajuh ka jingïarap sha ka Jylla Arunachal Pradesh,” u la ong.
U la ong ba ka tamasa ‘Cherry Blossom’ mynta u snem ka kham pynleit jingmut ïa ki samla.
“Haba ngi phai biang sha ka histori, ngi lah ban ïohi ba ngi don ki kynhun tem kiba la tem ha ki jaka rep slasha jong ka Assam ha ki snem 1950 bad 1960,” u la ong.
“Kumta, kumjuh ka long mynta, ha u snem 2026, uta u symbai uba la bet ha ki snem 50, mynta u la san, bad phin sngewkmen ruh ban ïohi ba mynta u snem ki ‘Cherryblossom’ ki la phuh ha ka por kaba biang, hashuwa jong ka tamasa,” u la ong.
Hashuwa ka tamasa, u Bah Lyngdoh u la pynbna ïa ka ‘Global Music Promoters Meet’ ha ka 19 tarik Naiwieng ban pynïasoh ïa ki nongrwai na la ka jong ka ri bad ki karkhana heh ka pyrthei.
“Lait na ka tamasa hi, katkum ka por ba la buh, ha ka 19 tarik u Naiwieng, ngin don ïa ka ‘Global Music Promoters Meet’, ha kaba ki ‘riewtbit ha ka liang ka rwai ka siaw ka put ka tem kin ïakynduh bad ki ‘riewdon sap ka thaiñ jong ngi khnang ban pynkhreh ïa ki kumjuh ban pynïasoh ïa ki, ban ïarap pynjanai ïa ki sap ki talen jong ki, bad ruh ban jubab ïa ki jingkylli bad ki jingtip, kano-kano kaba ki donkam ban ïoh bynta sha ka ïew jong ka rwai ka siaw ka put ka tem ka pyrthei,” u la ong.
U la ai khublei ruh ïa ka prokram ‘Chief Minister’s Grassroots Music’ na ka bynta ban tei ïa ka nongrim.
“Hashuwa ba ngin phai sha ka tamasa, nga dei ruh ban pdiang ïa ka jingshisha ba ka ‘Grassroots Music Project’ jong u Myntri Rangbah ka la pynpiar ïa ki thapniang jong ka bad mynta, la ithuh ïa ka kum kawei na ki prokram rwai bad ka put ka tem ba paka tam ha ka ri,” u la ong.
Kane ka tamasa kaba ar sngi kan don ki nongrwai kiba la pawnam ha ka pyrthei kum u ‘Nelly’, ‘Khalid’ bad ‘Boys Like Girls’, ha ryngkat ki nongtem napoh ka thaiñ.
“Ka tamasa, kumba nga la kdew, kan sdang da ka ‘Global Music Promoters Meet’ lem bad ki nongtem na kane ka thaiñ, ka ban sa bud sa ka tamasa kaba ar sngi ha Madan Kurkalang, Bhoirymbong, ha kaba ki nongrwai ba pawnam ka pyrthei kum u ‘Nelly’, ‘Khalid’, ‘Boys Like Girls’ kin ïashim bynta,” u la ong.
“Ban ai jaka lang bad rynsan ïa ki nongrwai bad nongput-nongtem ba tbit na ka Jylla, ngin wanrah ïa ki kynhun tem kum ka ‘Daminot’ bad ki nongrwai kum u Leonard bad u Meban, bad ha ka sngi kaba ar, ngin don ïa u James Ray, Jessi Lyngdoh ban ïasam lang ïa ka rynsan bad ki nongrwai kum u ‘Khalid’ bad u ‘Swelly’,” u la ong.
Halor ka jingwan ki nongjngohkai pyrthei, u la ong ba ki jingkheiñ jong u snem ba la dep ki buh ïa ka nongrim.
“Ha u snem ba la dep, ha ki ar sngi, ngi la don palat 50,000 ngut ki briew, bad ka jingdon jong ki nongjngohkai pyrthei na kata ka 50,000 ngut ka long haduh 40%,” u la ong.
“Ngi khmih lynti ïa kiba kum kine kijuh ki jingkheiñ mynta u snem,” u la ong.
Halor ka jingpynlut, u la ong ba ka jingkheiñ kaba khatduh kam pat don.
“Kam dei ka jingkheiñ kaba khatduh namarba ka dei ka jingpynlut kaba dang ïaid shakhmat, namarba ngi hap ban khmih ïa baroh, lem bad ka jingdie ki tiket bad ka ‘Sponsorship’, kumta ngin sa tip lehse shibnai hadien ka tamasa,” u la ong.
“Nga tharai ba ngin sa ai sha phi ïa baroh hadien ka tamasa, khnang ba ngin tip tikna kumno ki jingkheiñ ki long,” u la ong.
Halor ka jingpynsngewthuh pyrshah ïa u drok bad ka jingpang HIV, u la ong ba ki pulit kin pynlong ïa ka jingïalap ha katei ka jaka.
“Hooid, ka tnad pulit kan sa leh ïa kata. Ki la ïoh katto-katne ki ‘Stall’ na ngi bad kin sa pynlong ïa ka jingïalap pyrshah ïa u drok,” u la ong.
