Ka Sorkar ka shu thok ïa ngi, haduh mynta ki jingdawa ym pat urlong: KJDSTA

Shillong, Naiwieng 16 Ka Khasi Jaiñtia Deficit School Teachers Association (KJDSTA) ka la rai ban bteng beit ïa ka jingïakhih khlem buh por halor ki jingdawa jong ki ba la slem bha na ka Sorkar...

Shillong, Naiwieng 16

Ka Khasi Jaiñtia Deficit School Teachers Association (KJDSTA) ka la rai ban bteng beit ïa ka jingïakhih khlem buh por halor ki jingdawa jong ki ba la slem bha na ka Sorkar Jylla.

Ïa kane ka rai, ki nonghikai ki la shim ha ka jingïalang ba la long ha ka 16 tarik u Naiwieng, 2026, ha madan phutbol Saw Mer, Upper Shillong.

Haba kren sha ki lad pathai khubor, ka Kong Barbara Lamin, General Secretary ka KJDSTA ka la ong ba naduh mynta ka jingïakhih kan bteng bad ha ka 19 tarik la rai ban leit ïakhih hakhmat ka MBOSE, halor kine ki mat jingdawa.

“Ka jingshim ïa ka rai ban bteng beit ka jingïakhih, ka dei namar ba ki jingdawa jong ngi sha ka Sorkar haduh mynta, kam shym la pat urlong satia. Ki jingthoh kiba la phah sha ka Sorkar ruh khlem sngap bad khlem jubab. Kumta da kawei ka sur la rai ba ngin bteng beit ïa ka jingïakhih,” ka la ong.

Ka jingdawa ki nonghikai deficit, ka dei ka jingbym pyntreikam ïa ka Centralized Provident Fund kaba 10 percent, ka jingpynslem ban pynkiew ïa ka DA bad ki jingsiew ba sahteng, ka NPS, ki Pension Scheme jong u snem 2023 bad 2026, kiba ka seng ka la kyntait, ka jingkynnoh ba ka don ka jingleh thok ha ka jingpynkylla ïa ka Board of Trustees bad ka thungkam thungjam.

Shuh shuh ka la ong ba ka Sorkar, ka la shu thok pylleiñ pylleiñ ïa ki nonghikai deficit ba haduh mynta, kata ka jingdawa kam shym la pat urlong.

Haba kylli, ka Kong Barbara ka ong “Lada ha ka 18 tarik ka jingïakynduh bad u Myntri Rangbah ka Jylla u Conrad Sangma kan urlong, ka seng kan sa pyntip kumno ban leh, hynrei ka jingbteng ban ïakhih kan bteng beit bad ha ka 19 tarik ter-ter, yn sdang ka jingleit ïakhih sha MBOSE,” ka la bynrap.

Na ka liang u Bah Boswell Pala, President KJDSTA u la pynpaw ba hadien ka jingïakynduh bad u Myntri Rangbah, ki la pynsngew ïa ki jingeh jong ki ha u bad hadien ka jingïakynduh, ka ophis u Myntri Rangbah ka la phah ka shithi ban kyntu sangeh noh ka jingïakhih namar u Myntri Rangbah u la dep ïohsngew ïa ki jingdawa jong ki bad un sa bthah ïa ka tnad pule puthi ban peit bniah.

U Bah Boswell u la ong ba ka jingkular kam long kaba shai, hynrei ki shu ong ban peit bniah ïa ki jingdawa jong ki khlem da pynskhem ne pynshai bha, kumta u la ong ba katba kim pat ïoh ïa ka jingpyntikna, kin ïai bteng beit ïa ka jingïakhih ba khlem buh por.