La khang ïa ki trok ba kit palat ïa ka 28.5 ton ban ïaid na jingkieng Umiam

Shillong, Naiwieng 16 Ki bor pynïaid district jong ka East Khasi Hills ki la mih shakhmat ban ïada ïa ka jingkieng Umiam kaba dang shu dep shna thymmai na ki trok kit mar palat pud,...

Shillong, Naiwieng 16

Ki bor pynïaid district jong ka East Khasi Hills ki la mih shakhmat ban ïada ïa ka jingkieng Umiam kaba dang shu dep shna thymmai na ki trok kit mar palat pud, da kaba khang ïa ki trok kiba khia palat ïa ka 28.5 metric ton ban ïaid lyngba kane ka jingkieng ban kiew sha Shillong.

Kane ka hukum kaba la pynmih da u Deputy Commissioner ka EKH Abhilash Baranwal hapoh ka Section 163 kan treikam mardor bad kan bteng bad ïaid tad haduh da pynmih da kawei pat ka hukum lane tad ynda la pynïeng ïa kaba pura lane ki jaka thew kiba paka ha Umiam.

“…Nga la khang pyrshah ïa ka jingïaid jong ki kali kiba kit palat pud kata palat ïa ka jingkhia kaba 28.5 metric ton hapoh u pud u sam jong ka East Khasi Hills District bad khamtam eh ha ka surok ban wan sha nongbah Shillong bad ha jingkieng Umiam.

Ki bor district ki la ong ba ka jingpyntreikam ïa kane ka hukum ba shipor ka la long kaba donkam namar haduh mynta ym pat don ka weighbridge ban thew ïa ki kali kit palat pud kiba ïaid lyngba katei ka jingkieng.

Ka hukum ka la maham ruh ba ki trok kit palat pud ym tang ba ki buh jingma ïa katei ka jingkieng hynrei kumjuh ruh ïa ka jingshngaiñ jong ki paidbah.

“Kumjuh ruh ka jingïaid jong ki kali kit mar kiba kit palat pud kata palat ïa kaei kaba la ai jingbit kata kaba long 28.5 metric ton ha kylleng ki bynta jong ka East Khasi Hills District khamtam kiba wan kiew sha Shillong bad ïaid lyngba ka jingkieng Umiam, ki buh ïa ka jingma kaba shyrkhei ïa ka jingkieng kaba thymmai kumjuh ruh ïa ka jinglong jingman jong ka surok, ki nongleit nongwan bad kiwei-kiwei kiba pyndonkam ïa ka surok,” la ong ka hukum.

Ki bor district ki la maham ruh ba kino-kino kiba leh pyrshah ïa kane ka hukum kin mad ïa ki jingshah pynshitom kiba tyngeh hapoh ka kyndon Section 223 jong ka Bharatiya Nyaya Sanhita (BNS), 2023.