Shillong, Nailur 02
U National President ka National People’s Party (NPP), uba long ruh u Myntri Rangbah ka Jylla, u Conrad K. Sangma u la ong ba ka seng ka ngeit ha ka saiñ pyrthei jong ka jingmanbha watla ki don kiwei pat kiba ngeit ha ka saiñ pyrthei jong ka jingïaphiah.
“Ngam lah shah ïa ki jingkynthoh sniew, ngin ym lah ban tei ïa ka imlang-sahlang ne ka Jylla halor ki jingkynthoh sniew. Ki jingkynthoh sniew kin shu ïalam tang sha ka jingjulor jong ka imlang-sahlang, ki briew bad ka Jylla,” la ong u Sangma haba ai jingkren ha ka jingrakhe dap 12 snem ka NPP ha ka Lah Sngi U Blei.
Haba kdew ba ka NPP ka ngeit ha ka jingmanbha bad ka saiñ pyrthei jong ka jingmanbha, u la ong ba ka seng da lei-lei kan ym ngeit ha ki jingkynthoh sniew ne ka saiñ pyrthei kaba sniew, hynrei ka jingmanbha kan long ka thong jong ka seng.
“Ki don ki ‘riew shimet, briew, kynhun, seng kiba ngeit ban phiah ïa ka imlang-sahlang, kiba ngeit ba dei tang ka ‘divide and rule’ ka lynti ban ïaid shakhmat. Ngam lah shah ïa ka saiñ pyrthei jong ka jingïaphiah. Ngi ngeit ha ka jingïatylli bad kane kan ïalam shakhmat ïa ngi,” la ong u Sangma.
U la ong, “Ka NPP ka ngeit ban pynïatylli…ka NPP kam ngeit ha ka saiñ pyrthei kaba ïaphiah ne phiah ïa ki briew, hynrei ngi ngeit ban pynïatylli ïa ki paidbah bad ka Jylla.”
Haba pynpaw ka jingsngewnguh ïa baroh ki nongïalam kiba don mynta bad ka longïing jong ka NPP, u National President u la ong sha ki ba haba ki dei shi bynta jong ka NPP, kumta ki dei ruh shi bynta jong ka longïing ka NPP bad man la uwei-pa-uwei u dkhot jong ka seng u long uba kongsan ïa ka NPP.
“Kane ka Sorkar ka ngeit, haba ka shim rai bad teng-teng ngi tip ba kim long ki rai kiba suk ban shim – ngi shah kynthoh ruh halor kine ki rai,” u la ong.
“Ka don ka jingmut balei ngi don hangne…ka don ka daw balei u Blei u ai lad ïa ngi ban don ha kane ka kyrdan, ka long ban shim ïa kita ki rai lehse kiba kiwei kim lah ban rai ha ki por ba la leit bad lada ngim lah ban shim ïa kita ki rai, kata ngi pulom ha ka jingkitkhlieh jong ngi ïa kaba u Blei u la buh ïa ngi ha kane ka kyrdan,” ong u Sangma.
Haba kren shaphang u kpa lajong, u P.A. Sangma (Bam Kwai ha Dwar U Blei), u la ong ba u la hikai ïa u kawei kaba donkam eh ha ka jingim – “U ju ong ïa nga, Conrad, lada me rung sha ka saiñ pyrthei, wat pyrkhat ïa ka kyrdan. Lada me rung sha ka saiñ pyrthei, wat pyrkhat ïa ka pisa, lada me rung sha ka saiñ pyrthei, me dei ban don ïa thong ban ïarap bad shakri ïa ki paidbah. Lada kane kan pyntyllun ïa ka saiñ pyrthei bad ka jingshim rai jong me, kiwei-kiwei kin sa bud hi namar ki briew kin sa kyrkhu bad kyrshan ïa me. Hynrei lada me don pat ïa ka jingangnud ban ïoh kyrdan ne ban kamai spah, men kloi ban shim ïa ki rai ba bakla ha ka jingim bad ka saiñ pyrthei.”
Shuh shuh u National President u la bynrap, “Hooid, kin don bun kiba kynthoh, hynrei ngam pynleit jingmut ïa kine katba nga dang sngewthuh ba ka mynsiem jong nga ka long kaba dei, ka jingmut jong nga ka shai. Ngi don hangne ban shakri bad ngin ïai bteng ban shakri.”
