Shillong, Risaw 28
Ka Sorkar ka la ujor da ka ejahar (FIR) pyrshah ïa u Inspector jong ka Khasi Hills Autonomous District Council (KHA DC) namar ka jingleit khang ïa ka jaka jong ka Sorkar kaba la thmu na ka bynta ka projek Shillong Ropeway, la ong ka Commissioner & Secretary ba khmih ïa ka tnad Tourism Kong RM Kurbah ha ka sngi Balang.
“Ngi la dep ban ai da ka FIR ha thanad Laban pyrshah ïa u briew uba la khang ïa ka projek, u dei u Inspector,” ong ka Kong Kurbah bad bynrap ba ym pat don kano-kano ka jingkem briew haduh mynta naba ki pulit ki dang trei ïa ka kam lajong.
Haba pynshai halor ka khubor ba ïa ka Lower Terminal Point ha Lawsohtun la khang da ka KHADC, ka Kong Kurbah ka la ong ba kane ka jingleh ka dei kaba beaiñ naba ka jaka ka dei jong ka Sorkar.
“Ngi kwah ban ai ka jingpynshai halor kaei kaba la jia ha ka sngi Ba-ar. Ngi don ka jingtip ba ka jaka jong ngi, ka Lower Terminal Point na ka bynta ka projek Ropeway, la khang da u Inspector jong ka KHADC. Ngi kwah ban pynshai ba ka Lower Terminal Point ka dei jong ka Sorkar. Ka dei ka mar jong ka Sorkar,” ka la ong.
Ka Kong Kurbah ka la ong ba ka jingtei ha katei ka jaka ka dei kaba tang shipor kaba la buh da ka tnad katkum ki kyndon jong ka jingshngaiñ.
“Na ka bynta kino-kino ki projek ngi hap ban buh ïa ki jingtei ban pynthikna ba ngin bud ïa ki kyndon jong ka jingshngaiñ shwa ba ngin sdang ïa ka projek. Kane ka projek ka dei kaba hap hapoh ka New Development Bank kaba kdew ïa ka ‘environmental and social management plan’ ban pynthikna ïa ka jingïada ïa ka mei mariang. Na ka bynta kane ka kam, ngi la tei ïa ka ktem hangtei, kaba la pynïaid da ka tnad,” ka la ong.
“Namarkata, kane ka sienjam ba la shim ha ka jaka jong ka Sorkar ka long kaba beaiñ. Ka dei ka jaka jong ka Sorkar, ka dei ka projek jong ka Sorkar kaba la shim da ka tnad. Ban mushlia bad tuklar hapoh ka jaka jong ka Sorkar kam long satia kaba lah ban pdiang. Ngim sngewtynnad satia ïa kane bad ngi la shim ïa ki lad ki lynti kiba dei ban shim ban shimti biang mardor ïa ka jaka,” la bynrap ka Kong Kurbah.
“Ka jingthmu jong ka jingtei kaba la buh ka long ba kan tes ïa ka khyndew, shna ïa ki surok bad pyndap ïa ka madan. Kam pat don satia ka jingtei ne ïaid shakhmat jong ka projek haduh mynta. Kam pat don satia kano-kano ka jingtih ban pynïeng païa – ngi don hynriew tylli ki païa – ym pat don ka jingtih na ka bynta ka terminal. Kumta ka jingkynnoh ba ngi la sdang ïa ka kam, kam don satia,” la ong ka Kong Kurbah.
Ka Kong Kurbah ka la ong ba ïa ka work order la pynmih ha ka 25 tarik Risaw, 2025, ka NOC na ka Dorbar Pyllun la ïoh pdiang ha ka 4 tarik Jymmang, 2026 bad ka aplikeshon na ka bynta ka ‘trading license’ la ai sha ka District Council ha ka 18 tarik Jymmang, 2026.
Shuh shuh ka la ong, “Ki la aplai sa kawei ka NOC na u Syiem Mylliem ha ka 16 tarik Naitung, ïoh pdiang ka shithi ha ka 28 tarik Naitung. Ha ka 27 tarik Nailar, ka la don ka ‘show-cause’ ba la ai sha u kontraktor da ka District Council bad ïa kaba u kontraktor u la jubab. Ha ka 28 tarik Nailur, la ïoh pdiang ka NOC na ka Dorbar Myntri jong ka San Kur bad 11 Kur jong ka Riat Laban Mylliem. Kumta kane ka kam ka dang ïaid shakhmat.”
