Shillong, Risaw 28
U President ka National People’s Party (NPP) Meghalaya State Unit Bah Prestone Tynsong uba dei u Symbud Myntri Rangbah ka Jylla u la ong ba da ka jingrung ki lai ngut ki MLA kiba dang shu mih na ka UDP ban pynïasoh sha ka NPP ka la ai mynsiem ïa ka seng haba pynkhreh ïa ka ilekshon MP Lok Sabha ka ban sa long shen.
Kane ka jingpynpaw u Bah Prestone ka dei hadien ba u la pdiang ïa ki lai ngut ki MLA ka UDP ha ophis ka NPP kaba don ha Polo kaba la long mynta ka sngi Balang.
Kine ki lai ngut ki MLA kiba la dep mih na ka UDP ki long u Bah Paul Lyngdoh uba mihkhmat na West Shillong Constituency, Bah Renikton Lyngdoh na Mawkyrwat, katba u Bah Nujorki Sungoh na Mowkaiaw u khlem lah ban wan namar u don hapdeng ka jingshitom hynrei la wan mihkhmat tang ki nongkitkam bad ki bahaïing.
Ha kane ka sngi la ïadonlang u Conrad Sangma uba dei u President ka National People’s Party Sengkmie ryngkat ka jingïadonlang u Bah Sniawbhalang Dhar uba dei u Vice-President ka NPP Sengkmie, ki nongkyrshan jong ki lai ngut ki MLA kiba la wan sakhi lang kiba la ïoh ban pyrta ruh ïa ka symbol jong ka Kot.
Na ka jingrung kine ki lai ngut ki MLA, ka NPP kaba bat ïa ka bor synshar ïa ka Sorkar Jylla ka la poi haduh 36 ngut ki MLA ha Ïingdorbar Thawaiñ.
U Bah Prestone u la ong ïa kine ki lai ngut ki MLA u ju ïakynduh ha Secretariat bad ha ïingdorbar thawaiñ hynrei hapoh ka Constituency ki paidbah ki kham tip kham bha ïa ka jingtreikam jong ki.
U la ai jingïaroh ïa ki nongkyrshan kiba ki la shah ïa kine ki MLA ban wan pynïasoh sha ka NPP.
“Ngim dei ban sngewsarong ne pynheh shadem hynrei ngin long kiba sngewrit ban trei na bynta ka NPP khnang ba ngin ïoh ban rah ïa ka jingjop ha kane ka ilekshon MP Lok Sabha” u la ong.
Katba u Conrad K. Sangma u la ong ba ka jingwan pynïasoh kine ki lai ngut ki MLA ka dang pynkhlaiñ shuh shuh ïa ka NPP ha Meghalaya bad ha ka thaiñ Shatei Lam-Mihngi, namar ka NPP ka ïeng na bynta ka sur jong ki paidbah shaphang Shatei Lam-Mihngi.
“Ka jingjop ka wan dei ka jingïatreilang namar don ki por ba u Bah Prestone ne u Bah Sniawbhalang kim pdiang ïa ki mat ba la wanrah hynrei haba khatduh ngi trei na bynta ka jingmyntoi jong ki paidbah” u la ong.
U la phla ruh ba don ki don ki jingeh kiba ki ïakynduh hapoh ka seng tangba kim ju pynmih shabar ne ban kren sha ki lad pathai khubor hynrei ki ïapynbeit tang hapoh ka ïing ka sem.
Ha kajuh ka por u la kyntu ïa ki nongkitkam ka NPP ba kim dei ban don ka mynsiem sngew sarong namar haba ym don ba tah poster na bynta ka NPP, kum ki nongïalam ki hap ban mih shakhmat ban trei na bynta ka seng wat ban tah poster ruh.
