Shillong, Risaw 28
Ka met ïap jong ka longkmie kaba trei ha kad liengsuiñ ha Tripura kaba la khlad ha Bangladesh la ïoh ban leit buh mynta ka miet kaba dei ka 28 tarik Risaw shaduh ïingsah ha Guwahati da ka jingïarap ka kali kit nongpang ka seng RBYF.
Kane ka kali kit nongpang la ñiah hi da u samla Amunick Shadap uba dei u Vice-President ka RBYF Bhoirymbong Circle ryngkat ka jingsynran ki dkhot uba la leit shaw ïa kane ka metïap na Dawki ban leit pat sha Civil Hospital Shillong hadien kata la buh noh sha Guwahati .
Kane ka longkmie ka dei kaba la tip kyrteng kum ka Anjana Bhowmik kaba pang jur ka la khlad hadien ba ka liengsuiñ kit nongpang ka la hiar kyrkieh ha nongbah Dhaka ha ka 18 tarik mynta u bnai Risaw 2026 .
Kane ka liengsuiñ kit nongpang kaba tip kum ka “air ambulance” jong ka Airports Authority of India (AAI) kaba don ha Maharaja Bir Bikram (MBB) Tripura, kaba kit ïa ka longkmie kaba la khlad noh hadien ba ka air ambulance kaba kit ïa ka na ka nongbah jong ka Tripura sha Kolkata, ka la hiar kyrkieh ha ka kad liengsuiñ jong ka Dhaka, hadien ba la pyntip ba ka la don jingthut ha ka liengsuiñ.
U samla Amunick u la ïathuh ba u la mih na Bhoirymbong ha ka por 8:00 baje mynmiet jong ka 27 tarik ban leit sahmiet lypa ha Dawki ban sa leit shaw ïa ka metïap bad ki bahaïing kiba sahkut ha Bangladesh.
U samla Amunick Shadap u ba bat kum u Vice President ka Ri Bhoi Youth Federation Bhoirymbong circle ryngkat ki dkhot bad ki bahaïing katei ka longkmie ki la hiar sha Civil Hospital Shillong ban pan kali kit nongpang da kawei hynrei kim ïoh, kumta kim banse ban leit buh hi sha Guwahati.
U la ïathuh ba kane ka metïap ka la sma bha namar la don kumba 10 sngi eiei.
