Shillong, Risaw 28
Ka Congress ka dang ïaleh ban pynkhlaiñ biang ïalade ha ka thaiñ Shatei Lam-Mihngi bad ban khyllie pat ïa kaei kaba la duh ha kine ki por ba la dep, ong u dkhot ka Congress Working Committee (CWC) uba long ruh u nongïalam barim ka Liang Pyrshah ha Lok Sabha u Adhir Ranjan Chowdhury.
U Chowdhury, u ba la pynlong ïa ka jingïalang bad ki nongïalam ka party ha nongbah Shillong, u la ong ba ka party ka la shah ktah namar ka jingphet seng ki nongïalam bad ka saiñ pyrthei ba pynïapher jaidbynriew.
“Ka thaiñ Shatei Lam-Mihngi ka dei ka thaiñ kaba ngi hap ban trei shitom ban pynïoh pat ïa ka jaka ba la duh noh. Ha Meghalaya ruh, kumba long kiwei ki Jylla, ngi la mad ïa ka jingshah thied ki nongïalam da ki party ba don ha ka Liang Synshar” u la ong.
Haba ther ïa ka Bharatiya Janata Party (BJP) u Chowdhury u la ong “Ngi la mad ïa ka jingeh namar ka jingleh ‘politic’ kaba la wanrah ïa ka jingsngew ïapher jaidbynriew da ka party ba synshar. Kiba bun ki party riewlum ha ka thaiñ Shatei Lam-Mihngi ki la kylla long ki paralok ba ïatreilang jong ka Sorkar bad ki la pyndonkam lut ïa ka jingdon jingem ban pyntroiñ ïa ka Sorkar ba kan bteng ban don ha ka bor.”
Wat hapdeng kane, u Chowdhury u la ong ba ki nongïalam bad nongkitkam ka party ki dang ïai long kiba trei shitom. “Phi la ïohi mynta ïa ka mynsiem treikam jong ki nongtrei ka party ha ka ophis ka party. Ngi la ïakren ïa ki buit treikam jong ngi. Kumba long ha kiwei ki bynta jong ka Ri, ka Congress hangne ruh ka dang ïaleh ban pynkhlaiñ biang ïalade,” u la ong bad bynrap ba ka Congress kan sa khlaiñ biang ha ki thaiñ Shatei Lam-Mihngi jong ka Ri India ba kynthup ruh ha ka Jylla Meghalaya.
