Shillong, Risaw 28
Ki nongïalam bad dkhot jong ka ‘Joint Action Committee Against Shil-long Ropeway Project and for Protection of Lum Shyllong Catch-ment’ (JAC) kiba la khmih lynti ïa ka rai kaba bha na ka Executive Committee jong ka Riat Laban Dorbar Pyllun ban pyndam noh ïa ka jingïateh ai wai jaka kaba la ïasoi bad ka Sorkar na ka bynta ban tei ïa ka ‘Ropeway’, ki la poi sha ka jingïania bad ka thma ktien hadien ba ki nongïalam ka Dorbar Pyllun kim shym la poi sha ka rai kaba pynhun haba ïadei bad kane ka bynta.
Hadien ka jingïalang, ki dkhot jong ka Dorbar ki la pyntip sha ka JAC ba kin khot ïa ka jingïalang ha la ki jong ki jong ki Dorbar Shnong jong ka Laban Pyllun ha ka 14 tarik u Naiwieng ban pan ïa ka jingmynjur na ki nongshong shnong halor kane ka kam.
Hynrei kiba bun na ki dkhot jong ka JAC kiba kynthup kham bun ki kynthei kim shym la mynjur haba ïadei bad kane.
Na ka liang ki nongïalam ka JAC, ki la pynpaw ïa ka jingbitar bad ki la ong ba kin sa khot biang ïa ka jingïalang ban ïakren ïa ki sienjam kiba bud ha ka jingïakhih jong ki ban pyrshah ïa katei ka projek.
“Nga kum u Secretary jong ka Dorbar Pyllun, nga la leh ïa kaba bha tam, 23 tarik hadien jong ka jingïalang. Nga la wanrah ïa kato ka mat bad nga la pynshai ruh sha phi ba ngin leh ïa kaba kwah ki nongshong shnong,” ong u Bah G. Lyngdoh, Secretary ka Dorbar Pyllun haba pynshai sha ka JAC.
Haba pynkynmaw biang, u la ong, “Haba phim ïa hun, phi la kyrpad ba ka Dorbar Pyllun kan thoh sha ka Sorkar ban pyndam lane kynriah noh ïa kane ka projek. Nga la wanrah ïa kane kajuh ka sobjek ha ka 23 tarik. Nga la wanrah da ma nga hi, hynrei kim mynjur, ki ong ap shuwa 10 sngi.”
Hynrei u la pynpaw ba namarba ka jingwan mih jong ki dkhot bad nongïalam ka JAC sha ïing jong u bad u President ha ka Sngi Balang, um banse ban khot biang ïa ka jingïalang watla ym pat dap 10 sngi.
“Nga kloi ban thoh sha ka Sorkar kum u Secretary da ka jingmynjur jong ka komiti. Nga khot khnang ba dei ban mynjur ban thoh sha ka Sorkar kumba kwah ma phi, la yn pyndam ne kynriah ïa kane ban wanrah ïa ka suk ka saiñ hapoh shnong, ban don ka jingïatylli khlem ka jingïakynad,” u la ong.
“Nga la leh ïa kaba bha tam, hynrei phi la ïohi hi ba kiwei-kiwei ki dkhot, kim pdiang ïa kane,” u la ong da kaba bynrap ba marwei um donbor ban thoh na ka liang ka Dorbar Pyllun.
Shuh shuh u Secretary u la ong ba kumba la ong u President, la shim ka rai ba dei ban leit sha man la ki shnong namar la jied ïa ki Rangbah Shnong da ki paidbah nongshong shnong ban pynsngew bad shim jingbit na ka shnong la ka dei ne em ban thoh noh sha ka Sorkar halor kane ka kam.
Ha kajuh ka por, la buh ruh ïa ki pulit ha Riat Laban ban khmih ïa ka shong suk shong shngaiñ ha kane ka jingïalang jong ka Executive Committee. Kane ka sngi ka dei ruh ka jingkut jong ka jingai por kaba 10 sngi ba la buh da ka JAC ïa ka Sorkar Jylla ban pyndam ne pynkynriah noh ïa ka projek ‘Ropeway’ na ka jaka ba la thmu.
