Shillong, Nailur 03
Ka jingthmu ban tei da ka Shopping Mall ha ka jaka jong ka PWD kaba don ha Barik ka la shah kyntait noh shisyndon ha kaba yn tei noh da kaba yn tip kum ka ‘Projek Jingïatylli’ ka ban kot kumba T.25 klur bad ïa ka jingpynwandur kaba bniah (master plan) na ka bynta kane ka projek, kata ban pynkylla dur ïa ka Barik la pyllait da u Myntri Rangbah u Conrad K Sangma uba la plie ruh ïa u ‘post’ uba jrong kumba 40 metre ban pynher ïa ka lama India.
U Myntri Rangbah u la plie ïa kane ha ka Sngi Ba-ar ha ka jingïadonlang kiwei pat ki Myntri Sorkar kiba kynthup ïa u AT Mondal, u Bah Comingone Ymbon nalor u Chief Secretary, DGP bad kiwei kiwei ki ophisar.
Haba ai jingkren ha kane ka jingïalang, u Conrad u la ong ba kane ka projek ka dei na ka bynta ban pynwandur ïa ka jaka ha Barik bad ïa kane yn tip kum ka ‘Projek Jingïatylli’ lane ‘Unity Project.’
Kane ka jaka jong ka PWD ha Barik ka don ka jingheh kumba 3.5 akar ha kaba yn pynkylla dur ïa kane ka jaka lyngba ki jingtei bapher bapher ki ban pynitynnat ïa kane ka jaka.
Haba ai jingkren u Myntri Rangbah u la ong ba ha kane ka jaka yn tei bun tylli ki jingtei ha kaba yn pynneh pynsah ïa ki ïing kiba la rim bad kot spah snem kiba don ha kane ka jaka.
U la ong ba kane ka projek kan dei ka jingtei jong ka jingïatylli namar yn kynthup lang ïa ki lariti jong ki jaitbynriew trai muluk ka Jylla ha kane ka jaka ban pyni sha ka pyrthei.
U Conrad u la ong ba ynda la dep ban tei ïa ki jingtei ha Barik kane ka jaka kan kup da kawei pat ka dur kaba itynnat bad kan dei ka projek jong ka jingïatylli ha kaba yn ai kyrteng thymmai ruh ïa kane ka jaka kaba don ha Barik.
Kum ban pynkynmaw, ha u snem 2019 ha ka por ba long Myntri Sorkar u Bah Hamletson Dohling kum u Myntri ka tnat Pynroi Sorkar la don ka jingpynkhreh ban tei ïa ka ‘Iconic Structure’ hynrei ynda shimti u Bah Sniawbhalang Dhar kum u Myntri ka tnat Pynroi Sor, kane ka jingpynkhreh kam shym la ïaid shuh shakhmat namar ka don ka jingthmu ban tei noh da ka Shopping Mall.
Ha ka jingshisha, ha ka por jong u Bah Hamletson Dohling, ka Sorkar ka la pynlut ruh T.12 lak ban pynkhreh ïa ka jingwandur ban tei ïa ka Iconic Structure ha Barik.
Kumta, da ka jingpyllait u Myntri Rangbah ïa ka Master Plan ban pynkylla dur ïa ka Barik, ka jingthmu ban pyntrei da kiwei pat ki projek khamtam ka Shopping Mall ka la kut noh.
U Conrad u la ong ba ki jingtei u menbarim kiba la don lypa yn nym jynrat ne pynduh noh hynrei yn sa pynneh pynsah shuh shuh ïa ki. U la ong ba la khmih lynti ba ha u Risaw lane Naiwieng, yn lah ban sdang ïa ka jingpyntrei ïa ki projek bapher bapher katkum ka jingbiang ki kot ki sla.
U la ong ba ha kaba bakut jong u Risaw ne basdang u Naiwieng, lehse yn sa lah ban sdang pyntrei noh ïa ki projek.
U la ong ba ki trai muluk ka Jylla ki la ïakhun lang ban ïoh ïa ka Jylla bad dei na kane ka daw ba un hap ai kyrteng ïa kane ka projek ha ka kyrteng ka jaitbynriew.
