Shillong, Jylliew 15
Ki nongdie madan kiba ju shong ha shilynter ka surok ban poi ha Vishal, ha ka 15 tarik u Jylliew 2026, ki la shong rah plakad hadien ba ka Shillong Municipal Board (SMB), ka la bthah ban sangeh die jingdie ar sngi, kata sngi Nyngkong bad sngi Ba-ar, namar ba ka don ka jingïalang ki heh Sorkar ha Courtyard.
Kane ka jingbthah ka Shillong Municipal Board ban phah khang die jingdie, ka la mih ka jingpyrshah na kitei kiba die madan ha kitei ki jaka, da kaba mih surok ban rah da ki plakad.
Baroh kiba ju shongdie jingdie ha kitei ki jaka, ki la ïa shongkhrui ryngkat ki plakad, ba kynthup ki Khasi bad kumjuh ruh ki bar jylla.
Ha ki plakad ki nongdie madan ki la thoh, ‘Man ba wan ki Myntri Sorkar Pdeng ka shu pynïap thngan ïa ngi,’ ‘Ka jingpynduh bylla sngi kadei ka sang ka pop,’ bad kiwei kiwei de ki jingthoh ba pyrshah ïa ka Sorkar.
Haba kren sha ki lad pathai khubor, ki longkmie Khasi ki la ong ba kane ka jingleh ka Sorkar, ka ktah ïa ki bad ki shem jingeh namar ba ki bylla mynsngi bad bam da miet.
Ki la pynpaw ba ki bylla la ka jong ka jingbylla, hynrei ban khang ïa ki tang na kadaw ba long kata ka jingïalang ki heh ki haiñ, kan ym lah ban long.
“Ngim dei kiba die drok ne die kyiad, ngi kiba rit ba ria ym ïoh bylla tang shi sngi, katno ka long ka jingduh nong,” ki la ong.
“Lada ka Sorkar ka shu khang beit kumne ban die jingdie, da ei ngin bsa ïa la ki khun nalor ba ngi bylla kynthei. Ka ktah bha kane ka jingkhang ka Sorkar, namar mynshem taïew ruh ka Sorkar ka la khang bad mynta ka la bthah biang ban khang ïa ki dukan, ka long shisha kaba la ktah ïa ngi,” la bynrap kiba die madan.
Kumta ki nongdie madan ki la kyrpad ïa ka Sorkar, ba kadei ban ai ka jaka ba kin ïoh shongdie jingdie, tang ban ïoh bylla, “Ai ba kita ki baheh bahaiñ kin don jingïalang hynrei ma ngi pat, ngi dei ban ïoh shongdie jingdie.”
