Shillong, Jylliew 15
Ki ar tylli ki metïap, kiba la suba shah pynïap hynnin ka sngi u Blei, ka 14 tarik u Jylliew 2026, u wei u shynrang bad kawei ka kynthei, kaba la lap hajan ka dukan ha Lumsohphoh, kidei ba la tip kyrteng u Semanto Hajong, 22 snem ka rta bad ka Pronome Hajong, 21 snem ka rta.
Ïa ka metïap jong kitei ki ar ngut ki briew, la lap ha ka por kumba 7 baje eiei mynstep.
Haba ïakren bad u Superintendent of Police (SP) ka East Khasi Hills District, u Bah Vivek Syiem u la ïathuh ba ki pulit ki la ïoh jingtip ha ka por 7 baje mynstep, bad mar-mar ki pulit ka Laitumkhrah Police Station ki la leit sha kane ka jaka bad la ïohi ba u don u tyllai ha Ryndang jong ki, mar-mar ki pulit ki la ker noh ïa kane ka jaka bad khot ruh ïa ka kynhun Forensic, ban leh ïa kaba donkam.
U Bah Vivek u la ïathuh ba ïa kine ki ar ngut, la ithuh ïa ki kum u Semanto Hajong 21 snem ka rta na Ranikor bad ka kynthei kaba kyrteng ka Prenome Hajong kaba na Balat. Ki pulit ki la pyntip sha ki bahaïing hasem jong kine ki ar ngut.
“Katkum ka jinglap ïa ka jingtohkit kaba ki leh hynnin ha kato ka jaka, ym shym la lap dak mong ha ka met jong ki, lait noh tang na ryndang, ïa ka met jong kine la rah noh sha NEIGRIHMS ban leh ïa ka Post Mortem bad ïa ka kaiphod yn sa ïoh ha kine ki sngi ban wan. Halor kane ka jingjia, ngi la register da ka UD case ha Laitumkhrah PS,” u la ong.
U Bah Vivek u la ïathuh ba kine ki arngut ki trei hajan jong kato ka jaka hi bad ki la don jingïadei samla la katto katne, haduh mynta hi ka paw, ba kadei ka jingshim hi ïa la ka jong ka jingim, hynrei yn sa tip shai hadien ba la ïoh ïa ka kaiphod post mortem. Da kaba bynrap “Ki pulit ki dang pynlong ïa ka jingtohkit ïa ka daw ba ki phasi ïalade, kaei ka daw kaba kin hap ban dkhat ïa ka jingim lajong”.
U la ïathuh ruh ba ïa kane ka jingjia, ki pulit ki ïoh jingtip na u Rangbah Shnong, kine baroh ar ngut ki trei hajan hangto hi, ka Kynthei ka trei ha kawei ka Café bad u Shynrang u trei ha kawei ka jaka die light. Kine baroh ar ngut ki sah ha Lumsohphoh, ka jaka ba la pynkhreh da u Trai.
Shuh shuh u la ong ba ha kato ka miet, ka kynthei ka mih na dukan kumba 12:35 mynmiet bad u shynrang ruh u mih 12:00 baje, ki pulit ki dang tohkit, balei kine ki arngut ki shim ïa la ka jong ka jingim.
U Bah Vivek u la ïathuh, ba ki la ïoh ïa ki durkhih na ki CCTV katto katne, bad ki pulit ki dang pynlong ïa ka jingtohkit ïa kane bad ïa ka met jong kine ki arngut, tang shu dep ïa ka Post Mortem, kin sa aiti noh sha ki bahaïing hasem.
