Shillong, Jylliew 15
Ka Kong Sarlinda Kharlukhi kaba long kum ka nongkitkam jong ka Fair Price Shop Meghalaya, na ka jingïoh jingtip ba ka don ka bhah ba ka Sorkar India ka la pynmang na ka bynta ki ba sam khaw rashon, ka la mih shakhmat ban pynpaw ba ka don ka jingsahkut ka pisa kaba long haduh T.39,80,21,333 kaba dei naduh u snem 2016.
Haba kren sha ki nongthoh khubor ha ka lah Sngi u Blei ka la ïathuh ba ka la pyrshang ban wad jingtip bha haba ïadei bad kane ka jingsahkut katei ka pisa bad ka la pynpaw ruh ba kane ka jingsahkut pisa ka la buh jingeh bha ïa ki nongsam khaw rashon khamtam kiba dei na ki shnong ba na nongkyndong.
Shuh-shuh haba kren ka la pynpaw ka jingsngewkhia ba katta katei ka pisa kaba ki nongsam khaw rashon ha ki shnong ki thaw ki dei ban ïoh, hynrei ym don ban tip bad ka ïoh ban sahkut khlem don nongwad jingtip, ka la ïathuh ba haba ïadei bad kane ka bynta ka la dep ban phah da ka jingthoh sha ki nongïalam jong ka All India Fair Price Shop Dealers’ Federation (AIFPSDF) kumjuh sha ka Under Secretary ka Food Supply Meghalaya ban kyrpad ba kin shimkhia ban buddien ïa kane.
Ka Kong Sarlinda ka la ïathuh ba kane ka jingbymïoh ki nongsam khaw rashon ïa katei ka pisa ka dei naduh u snem 2016 ter-ter haduh u snem 2024 bad ka la kyrpad ïa ka Sorkar Jylla lyngba u Myntri ba dei peit ba kan pynlong ka jingbuddien la kane ka pisa ka la lait ne em bad lada ka long ka ba lah ban pyllait noh kham kloi ïa kane ka bhah ba la mang da ka Sorkar Pdeng.
Ka la pynshai ruh ba ka long kaba kloi ban ai ka jingïatreilang na bynta jong kane bad ka la ïathuh ruh ba ha ka 29 tarik kan ïoh lad bad leit ïashim bynta ha ka jingïalang jong ka AIFPSDF ka ban long ha West Bengal bad ban buddien ruh shaduh ka Ministry Food Supply ka Ri India khnang ba kan long shisha ka jingmyntoi ïa ki nongsam khaw rashon ba hapoh kane ka Jylla.
Ka la ong ka jingmih shakhmat jong ka ban pynpaw ïa kane, kam shym kwah ban kynthoh ne kynnoh ïano-ïano, hynrei ka ïeng beit ha ka nongrim ba ki nongsam khaw rashon ha ka Jylla ki dei ban ïoh ïa ka hok jong ki.
