Shillong, Jylliew 15
Na ka jingbym suidñiew bad bym burom ka Khasi Hills Autonomous Dis-trict Council (KHADC) ïa ka jingdawa ki Khlieh Nongsynshar Shnong ka Hima Sohra ban ithuh pura bad ai sanad noh ïa u Pa’iem Marremdor Syiem ba un long noh u Syiem ba pura, ha ka 15 tarik u Jylliew 2026 ki la leit ban tied jingkhang sha u Lat ka Jylla ba un tuklar lem haba ïadei kane ka mat.
Haba kren sha ki nongthoh khubor hadien ka jingïakynduh ïa u Lat ka Jylla u C.H Vijayashankar, u nongaibuit ka kynhun u Pa’iem Laborious, u la ïathuh ba ka jingleit ïakynduh jong ka kynhun ïa u Lat, ka long ban pynsngew ha u ba ka Hima Sohra ka la dep ban jied ïa u Marremdor Syiem ba un long kum u Syiem ba pura jong ka Hima, namar ka jingkhlad noh u Pa’iem Freeman Sing Syiem ha u snem ba la dep.
U la ïathuh, ka nongrim ba ka kynhun ka leit ban phah tuklar ha u Lat ka Jylla halor kane ka kam ka dei namar ba u dei uba hakhlieh duh ban peit ha ka Jylla bad u ba peit ïa ka Riti Synshar.
U la pynkynmaw ba ka Dorbar Hima Sohra ka la jied ïa u Pa’iem Marremdor katkum ki rukom pynïaid ka Hima ha ryngkat ka jingbud ryntih ïa ki riti ki dustur jied Syiem ba la ju leh ha ki por ba la leit.
U Pa’iem Laborious, u la kynthoh haba ïadei ka jingmih u wei pat uba dei na ka kur ka jait Syiem uba pynpaw ba u kwah ban ïakhun ïa ka khet Syiem, ha kaba u la ong ba utei u briew da ki spah snem u khlem sah shuh hapoh ka Hima Sohra bad u dei ruh u ba la long Khristan, kaba u la pynksan ba ka Hima Sohra kam pdiang ba un long u ba bit ban ïakhun ha ka khet long Syiem.
U la ban jur ïa ka KHADC ba kan sngew kan sngap ïa ka sur jingdawa jong ki Khlieh Nongsynshar Shnong bad ka Hima baroh kawei ba kan pynkloi noh ïa ka jingai sanad pynskhem ïa u Marremdor ba un long noh u Syiem ba pura jong ka Hima bad bynrap ba ka Hima ka don jingkyrmen ba u Lat ka Jylla un shimkhia haba ïadei kane ka mat.
