Mawkyrwat, Nailur:
Ka Hynñiewtrep Achik National Movement (HANM) ha ryngkat ka HANM Ranikor Circle ha ka 2 tarik u Nailur 2024 ka la ïoh ban pynkut noh ïa ka jingïaid lynti ban ai jingsumar khmat ei ïa ki paidbah (Free eye Medical Check Up) ha ka shnong Nonghyllam, South West Khasi Hills District.
Ha katei ka sngi la ïadonlang u Bah B Wahlang, Vice President HANM SWKHD, Bah Brustar Thongni, President HANM Ranikor Circle, Secretary shnong Nonghyllam, ki doktor bad ki nurse bad ki paidbah.
U samla Lambokstar Marweiñ, President HANM SWKHD haba kren sha ki lad pathai khubor u la ïathuh ba ka seng ka la sdang ïa ka kam ban shakri ïa u paidbah naduh u bnai Ïaïong 2024. U la ïathuh ruh ba ha kine hynriew bnai, ka seng ka la ïoh ban pyndep haduh kumba 136 tylli ki shnong ban ai jingsumar khmat ei ïa ki paidbah jong ka Mawkyrwat bad Ranikor Block.
U samla Lambokstar u la ong ruh ba ka seng wat la ka la pynkut noh ïa kane ka jingsumar khmat ei hynrei kan dang ïai bteng ban ai jingshakri pat ïa u paidbah lyngba kiwei pat ki kam.
Shuh shuh u la ai khublei kyrpang eh ïa u Deputy Commissioner jong ka South West Khasi Hills District, ïa kito ki riew rangbah kiba la noh synñiang sha ka seng kumjuh ruh ïa ki myntri shnong, ki Secretary shnong bad ki Asha kiba la ai ka jingïatreilang bad ka seng.
