Nongpoh, Nailur 05
Ha ka jingjia twa khyndew kaba la jia ha ka miet jong ka Sngi Balang, kawei ka longïing jong ki shi kurim lem bad kawei ka khun, ki la lait thaw na ka jingjia ba sngewsih hadien ka jingtwa kynsan jong ka khyndew ha ka ïingsah ka jong ki ha ka shnong Shangbangla, kaba don harud ka surok bah National Highway 6.
Katkum ka khubor kaba la ïoh lum, la ïathuh ba ka jingtwa jong katei ka khyndew ka dei ha ka por kumba 8 baje eiei janmiet hadien ka jingther jong u slap uba la neh kumba lai kynta tam kaba la pynlong ïa ka khyndew ban shong synjor bad twa ha ki bynta jong ka ïing bad ka dukan.
U trai jong katei ka longïing kaba la mad ïa ka katei ka jingjia, u Bah Teiborlang Wahlang, u la ïathuh ba ma u, ka lok lem bad ka khun, ki la lait thaw salit na ka jingjia ba sngewsih hadien ba ki la ïoh ban mih kloi noh napoh ka ïing ha shwa ba kan shah ban ha ka khyndew kaba la twa.
Utei u rangbah lem bad ka lok ka jong u, ki la ïathuh ruh ba baroh ki jingdon jingem ki jong ki hapoh ka ïing lem bad ki soh ki pai, ki jhur ki jhep bad ki tiar ki tar kiba don hapoh ka dukan, ki la duh bad julor lut bad pyntip ba ki don ruh ki soh ki pai kiba la shah rong noh ha ka umslap.
Na ka liang u Rangbah Shnong ka Shangbangla, u Bah Bishos Lawriniang, u la pynpaw ïa ka jingsngewsih halor katei ka jingjia kaba la wanrah ïa ka jingeh bad jingduhnong kaba khraw ïa katei ka longïing, bad pynpaw ruh ïa ka jingsngewnguh sha U Blei uba la pyllait ïa ki na ki jingmynsaw bad jingjia ba sngewsih lait noh tang ka jingjulor jong ka ïing, ka dukan bad ki jingdon jingem.
Halor katei ka jingjia, ïa ka ïing jong u Bah Teiborlang Wahlang, u Bah Bishos Lawriniang, kum u Rangbah Shnong, u la buh ka jingkyntu sha ki nongmihkhmat, ki bor sorkar ba dei khmih ba kin thaw lad thaw lynti lem ban ai ki lad jingïarap sha katei ka longïing kaba mad ïa katei ka jingjia ba sngewsih khnang ba kin lah ban seng biang ïa ka ïing ka sem bad ruh ïa la ka dukan.
