Nongstoiñ, Nailur 06
Ha ka Sngi Thohdieng, kumba 32 ngut ki samla pule na Nongstoiñ konstitwensi kiba la wan shakhmat ha ki jingpule ha ki kyrdan bapher-bapher mynta u snem kynthup naduh ki eksamin SSLC, HSSLC, Graduate, Post Graduate, PHD bad 3 ngut ki samla kiba ‘pass’ ïa ka ‘Prelims’ (MCS) jong ka MPSC ki la shah pynkup burom lyngba ka MLA Excellence Academic Award 2024.
Ïa kane ka jingpynkup burom la pynlong da ka Eman’s Charitable Trust ha ryngkat ka jingïasnohkti lang bad u MLA ka Nongstoiñ, u Bah Gabriel Wahlang ïa kaba la pynlong ha Bishop Hall, Nongstoiñ.
Ha kane ka sngi, u MLA ka Nongstoiñ, u Bah Gabriel Wahlang u la long kum u kongsan ha ryngkat ka jingdonlang u Bah Garod L.S.N. Dykes, Deputy Commissioner, u Bikram Marak, Superintendent of Police ka WKH, Bah E. Marngar I/c SDSEO WKHD, ki samla pule, ki khynnah skul ki nonghikai bad kiwei-kiwei.
U Bah Gabriel Wahlang haba kren kum u kongsan ha kane ka sngi u la pynpaw ka jingkmen kaba khraw ban tip bad ïohi ba ki la don haduh 3 ngut ki khun samla na ka dong ka thaiñ kiba la don ha ka thup ban ‘pass’ ïa ka eksamin ‘Prelims’ jong ka MCS kaba la long ka jingsngewsarong ïa ka thaiñ Nongstoiñ baroh kawei.
U Bah Gabriel u la kyntu ruh ïa kitei ki 3 ngut ba kin leh bha sa ïa ki eksamin kiba dang sah.
Shuh shuh u la ong ba kumba u la kular ban kyrshan bad ïarap pisa ïa ki samla pule kiba wan shakhmat ha ki jingpule, na ka liang u MLA u la pyndep ïa ka kular bad mynta ka kynti u la pynbna syndon ba un pynkiew noh ïa ka song pisa sha ka T.40 hajar ïa ki samla kiba ‘pass’ ïa ki ‘Prelims’ MCS, bad ïa kiba ‘pass’ ‘Prelims’ ïa ka IAS yn ai T.1 lak.
