Patna, ïaïong:
Ki la don kumba 163 ngut ki khynnah shynrang ba dang rit ka rta kiba la shah pynshisha ba ki shah khaïi na Bihar sha Maharashtra ki la shah pyllait im na kawei ka rel ha ka distrik Katni jong ka Madhya Pradesh da ki pulit ka tnat Railway.
Katkum ka kaiphod jong ka lad phah khubor, la ïathuh ba kitei ki khynnah, kiba don hapdeng 6 bad 13 snem ka rta, ki dei kiba la shah rah ban leit trei ha Latur, ha kaba ki pulit ka Railway Protection Force (RPF) bad Government Railway Police (GRP) ki la ïohbat ïa ki ha ka miet jong ka sngi Saitjaiñ hadien ba la ïoh jingtip na ka Child Welfare Committee (CWC), la ïathuh ki heh pulit.
Ha ka jingkhynra lang baroh shimiet, ki shipai jong ka RPF bad ka GRP ki la pynsangeh ïa katei ka kynhun jong ki 8 ngut kiba ïaid ryngkat bad ki khynnah rit khlem tiket ne ki kot ki sla kiba biang jong ka Patna-Purna Express ha station rel Katni, ong ka tyllong khubor.
U Inspector jong ka RPF Katni, u Virendra Singh, u la ïathuh ha ka tnad pathai khubor ba ki jingtip ba nyngkong ki pynpaw ba ïa kine ki khynnah la kit na ka thaiñ Araria jong ka Bihar sha Latur ha Maharashtra na ka bynta ki kam bylla.
U la ong ba ki bor pynïaid ki la leh hadien ba ki la ïoh jingtip shaphang ka jinglah ban khaïi briew bad ki la nang artatien namar ka jingbym don ki kot ki sla ban leit jingleit.
Hadien katei ka jingkhynra, ka GRP ka la ujor mukotduma pyrshah ïa kitei ki 8 ngut kiba la shah kynnoh katkum ka kyndon 143(4) jong ka Bharatiya Nyaya Sanhita (BNS), kaba ïadei bad ka jingkhaïi ïa u khynnah uba hapoh 18 snem ka rta. Baroh kitei kiba la shah kynnoh, la ïathuh ba ki dei na ki district bapher bapher jong ka Bihar.
Katkum ka jingong jong ki heh sorkar ba la kdew da ka tyllong khubor, ka CWC ka la pyntip sha ki bor pynïaid hadien ba ka la ïoh jingtip shaphang ka jingbun ki khynnah kiba la shah pynkynriah hapoh ki jinglong kiba suba. Nangta ki bor pahara ki la ap ïa ka rel ha ka Platform Number 5 bad ki la pynlong ïa ka jingtalasi ynda ka la poi, da kaba rah ïa ki khynnah rit sha ka jaka sah kaba shngaiñ.
U Manish Tiwari uba long u Child Protection u la ong ba ïa ki khynnah ba la pyllait im la pynsngewthuh bad ai jingsngeng jingkyntu, katba ka jingpyrshang ka dang ïaid shakhmat ban ïakynduh ïa ki bahaïing hasem jong ki.
Katto katne na ki khynnah la buh hapoh ki jaka ai jingïada ïa ki khynnah ha Katni bad Jabalpur namar ka jingpynshisha ban tip bniah shaphang jong ki ka dang ïaid shakhmat.
