Islamabad, Iaiong:
Katkum ki khubor, la iathuh ba ki kynhun runar bym don jingithuh, ki la thombor bad pynïap ïa 3 ngut ki bor pahara jong ka Pakistan Coast Guard, ha ka Sngi U Blei, ha ka jingthombor kaba nyngkong eh ïa kawei na ki lieng pahara jong ka tnat duriaw ka Pakistan, kaba la pyntreikam ha ka duriaw Arabian, ong ki heh katei ka tnat.
Ki heh syntiat bad ki heh pulit, ki iathuh ba katei ka lieng, ka dang don ha ka jingleit pahara kaba man ka sngi, ha kawei ka thain rud duriaw, kaba don hajan u pud jong ka Pakistan bad Iran, ha kaba ki lehnoh, ki la siat bad pyniap ïa lai ngut kiba don ha katei ka lieng.
Kane ka jingjia ka pynjur ïa ki jingeh ha ka liang ka jingïada ha Balochistan, ka jaka ba ki lehnoh ki jur bha ha kaba ki kynhun lehnoh ki ju thombor ïa ki bor pahara bad ki jingtei.
Ka kynhun shipai pynïapher kaba la khang pyrshah ka Balochistan Liberation Army (BLA) ka la kam ba ka dei ka jong ka ban leh ïa katei ka kam thombor. “Hadien ki jingtreikam ha khyndew, ka jingleh ha ki pud duriaw ka pyni ïa ka jingkylla kaba thymmai ha ka buit shipai jong ka BLA,” la ong ka BLA ha ka kyrwoh.
