New Delhi, Iaiong:
Sa shisien pat ki tyllong khubor ka Lebanon, ki iathuh ba ka Israel ka la leit thombor biang ïa baroh ki shnong ki thaw jong ka thaiñ South Lebanon, wat hapdeng ki jingiakren ba dang ïa pynbeit hapdeng ka US bad Iran ha kane ka por.
Katkum ki khubor, ki shipai Israel ki la pynpra ïa ki shnong da kaba pynpra ïa ki ïing ki sem da ki tiar pynbthei bad nangta ki pynbthei ïa ki ha ki jingbthei kiba heh bha kiba la pynïaid da ki jngai. Ka Guardian ka la bishar bniah ïa ki lai tylli ki video kiba la pynmih da ki shipai Israel hi bad kiba la saphriang ha ki social media kiba la pyni ïa kine ki jingpynbthei pathar kiba la jia ha ki shnong khappud jong ka Taybeh, Naqoura bad Deir Seryan.
Ki lad pathai khubor jong ka Lebanon ki la pynbna khubor ïa ki jingshah ther bom ruh ha kiwei pat ki shnong khappud jong ka Lebanon, watla ki dur satellite ban pynshisha ïa kita ki jingkynnoh ba kim shym la ïoh mardor.
Shuh shuh ruh la iathuh ba kane ka jingleit thombor jong ka Israel, ka long hadien ka jingbthah jong u Myntri iada ri jong ka Israel, U Israel Katz, ban pynpra ïa baroh ki iing- ki sem kiba don ha kito ki shnong khappud ka Lebanon, kaba la shim nuksa, na ka rukom treikam, kaba la pyndonkam ha Rafah bad Beit Hanoun ha Gaza. Ha Rafah, ha ka thain shatei lam mihngi jong ka Gaza, ki shipai Israel ki la pynjot 90 percent ki iing ki sem.Ka Guardian ka kdew ba ïa kajuh ka buit jong ka jingpynjot kaba heh ïa ki iing ki sem jong ki riew paidbah ha Gaza la batai da ki riewstad kum ka “jingpyniap iing” – ka jingpynjot kaba thmu, kaba ryntih ïa ki iing ki sem jong ki riew paidbah bad ka jingpynjot baroh kawei. Ka Israel ka la mad ïa ki jingshah kynnoh ba ka don ka jingpynïap pathar ha Gaza namar ka jingpyndonkam ïa kane ka rukom.
