Ha jingim bad jinglong briew kam da don jingïapher hangne ha pyrthei. Wat la ngi ïapher ha ka snam (Blood Group) hynrei ha ka jingim jongngi ki briew kam don kano kano ka jingïapher hapdeng para briew la kiba don ha ki niam bad ki bym don ha ki niam jong kane ka pyrthei. Kumjuh kiba da ïa thoh shongkurim lyngba ki balang bad kiba khlem da ïathoh lyngba ki balang ruh ki ioh kajuh ka jingim bad jinglong ba bha bad bakmen. Namar ha ngi ki briew ngi ngeit ba la thaw ïa ngi da u Blei uba long u nongthaw nongpynlong ïaka pyrthei bad ïa kiei kiei baroh hapoh khrum ka bneng. Ym dei tang kiba da ïathoh shongkurim kiba ioh jingieit jong u Blei. U Blei hi u ieit ïa baroh ki briew kiba im bad bashong ha kane ka sla pyrthei. Kam don kano kano ka jingbhah kyrpang ïa ngi ki briew ha u Blei. Namar baroh ngi hap ïaid lyngba ka jingïap ha ka jingim jongngi ki briew.
Ym don uba lait na ka sñi ka jingïap, watla ngi long kiba khraw ne kiba rit katno katno ruh ka rukom im bad ka jinglong ha kane ka pyrthei. Dei tang u Blei uba lah ban tip lypa ïa ka jingim bad ka jingïap jongngi ki briew ha kane ka por ba ngi dei ban hap jam ïa kane ka nongshun kaba long ka jingïap ha ngi ki briew. Naduh ki heh ki haiñ bad ki rit ki rain kim don jaka ban phet rieh na kane ka jingïap. Ka jingïap kan rat naphang lin ïa baroh ki kynja ba im baroh. Te khnang ba ngin lait na ka jingkhuslai jong kane ka pyrthei ngi dei ban phai khmat tang sha u Blei uba donbor tam eh halor baroh.
Ngi dei ban hun ha ka jingai ei kaba u Blei ula ai ha ngi ki briew ha la ka jong kajong ka rukom im ha kane ka sla pyrthei. Watla ngi ïapher ka jingim ha ka jinglong doh hynrei ka mynsiem kajuh ngi ïoh. Ka jingïapher ka don ha ka blood group kum ka Group -A- Group -B- Group -o- bad group -AB- hynrei ha ka mynsiem ym don group. Kane ka long ka jingim kaba ngi ïoh ha kane ka pyrthei.
C. B. Iawphniaw
