Shillong, Nailur 11
Ka Synjuk ki nongñiah kali kamai ‘Tourist’ ka Jylla kiba don hapoh ka shatri jong ka All Khasi Meghalaya Tourist Taxi Association (AKMTTA) ki la pynpaw ïa ka jingpyrshah halor ka jingleh mynthi jong ka Sorkar Jylla ban sngap ïa ki jingdawa jong ki halor ka jingïohlad ki kali kamai ‘Tourist’ kiba nabar ka Jylla ban wan kamai laitlan hapoh kane ka Jylla kaba la ktah pat ïa ka kamai-kajih jong ki trai ri-trai muluk.
Kum ban shu kdew hangne, na ka liang ka kynhun AKMTTA ha ka 9 tarik u Nailur 2024, ka la sdang ïa ka taïew jingïakhih da kaba sieh lama ïong ha ki kali kamai ne ka ‘Black Flag week’ ka ban kut haduh ka 14 tarik u Nailur, 2024.
Kane ka jingïakhih sieh lama ïong ha ki kali ka dei ka rai kaba na ka liang ka AKMTTA ka la shim ha ka 6 tarik u Nailur 2024 ha kaba ïa kane ka jingïakhih la ïashimbynta lang ruh ha kiwei-kiwei ki jaka kiba don markhap bad ka Sor Shillong bad ha kiwei-kiwei ki distrik ruh kumjuh. La ong ruh ba ha kane ka taïew sieh lama ïong kan ym don satia kano-kano ka jingsangeh kamai kali ne khang ïa kino-kino ki kali kiba wan nabar ka Jylla hynrei kan ïaid beit kumba ju long manla ka sngi. Haba ïakren bad u President ka Synjuk, u Bah Recaldinus Dohling, u la ong ba ka jingïakhih jong ki, ka dei namar ba na ka liang ka Sorkar Jylla kam shym la khot satia ïa ki sha ka miej jong ka jingïakren wat hadien ba na ka liang ka kynhun ka la leit ban buh da ki shithi na ka por sha ka por.
“Ngi la leit ban buh 2-3 tylli ki shithi bad ha ka 21 tarik jong u bnai Nailar ba dang shu dep ruh, ngi lah dep ban buh da ka shithi ba kan khot ïakren ïa ngi halor ka mat kaba ngi la dawa naduh mynshem snem hynrei na ka liang u Myntri um shym la pyntreikam ne khot ïa ngi”, ong u Bah Dohling.
Haba jubab halor ka jingong jong u Myntri ki kam jngohkai pyrthei ba ka jingeh ban khot ïakren ïa ki nongñiah kamai kali ‘tourist’ ka dei namar ba kam don ka jingïatylli hapdeng jong ki, na ka liang utei u President u la ong ba un sa ai jubab halor kane ka bynta ha ka 14 tarik u Nailur 2024 kaba dei ruh ka sngi jong ka jingkut noh ka jingïakhih jong ki nongñiah kali kamai ‘tourist’ ïa ka taïew jong ka jingsieh ïa ki lama ïong. “U Bah Paul u lah kren kumto bad ka lah biang kumto hynrei ïa mynta ngin nym pat lah ban ai jubab ïa u. Ki don shibun kiei-kiei kiba ngin sa ïoh ban jubab ha kane ka Sngi Saitjaiñ ïa kaei kaba u Bah Paul u la kren namar ba ngin shu jubab noh mynta, ka pynpaw ba ngi long kum ki khyllung khynnah”, la ong u Bah Dohling.
Ha kaba ïadei pat bad ka jingong jong u Myntri ba ka jingbym lah ban khang ïa ki kali kamai ‘tourist’ kiba wan nabar ban kamai hapoh ka Jylla ka dei namar ba ka Jylla ka duna eh haduh 3000 tylli ki kali kamai ‘tourist’, na ka liang u President u la buh jingkylli kylla ïa utei u Myntri da kaba ong ba ka dei ba duna 3 hajar ki kali kamai ne ka dei ba 3 hajar tylli kiba bun ki la shu shong sngi namar ka jingbym ïoh kamai shuh jong ki.
“Dei ba duna 3 hajar tylli ki kali ne ka dei ba 3 hajar tylli kiba shong sngi? Lada ka kamai ka wan, wat 4 hajar tylli kumba ka jingkheiñ kaba u Bah Paul u la ai ruh, 4 hajar tylli kin don ban pynbiang ïa ka kamai ban kit ïa ki nongwan jngohkai sha kane ka Jylla jong ngi”, la ong u President.
U Bah Dohling u la ong ba kane ka mat jingdawa kam dei shuh kaba dang mynta-mynne hynrei ka mat kaba wat kiba ha shwa jong u ki la ïakhih bad dawa ïa kane kajuh ka jingdawa. Hynrei hadien katto-katne por pat kane ka jingdawa ka la shu jah noh hynrei u la ong ba kum ka kynhun kan ïai ïakhun ban ïoh ïa ka jingjop na ka bynta ka bha ka miat jong ki nongñiah kali kamai ‘tourist’.
