Shillong, Nailur 17
Ka ïing kaba bun mala kaba la tei ha Mawkynroh, ha surok Mawlai Bypass la lap ba ka don hapdeng ka jingma kaba lah ban khyllem bad wanrah ki jingjia ba sngewsih lada ym leh eiei noh mardor.
Kane ka ïing mala kaba dei trai da u Bah Phanshon Thawmuit ka la paw bha hadien ka jingtwa khyndew kaba la jia ha u bnai Jymmang na ka jingwan ka ‘erlangthari Remal mynta u snem, namar la lap ba ka long kaba ima ka rukom tei bad ha ka jaka kaba lah ban twa.
Hadien ba lap ïa katei ka jingma na katei ka ïing bun mala, na ka liang ka State Disaster Management Authority ka la aiti ha ka NIT Shillong ban pule bniah ïa ka jinglong jingman katei ka ïing bad ki jaka.
Katkum ka kaiphod ba la aiti da ka NIT Shillong, ka la kdew shai ba katei ka ïing mala ka don hapdeng ka jingma kaba khraw ‘under very high risk’ bad donkam ban leh eiei noh mardor da ki bor ba dei khmih. Katkum ka kaiphod ka NIT la lap ruh ba ki jaka ba marjan na ka diang bad ka mon jong katei ka ïingmala ki don hapdeng ka jingma na ka jingtwa khyndew, bad ki trai jaka ki hap ban husiar bad leh eiei noh kloi.
Ka kaiphod jong ka NIT ka la kdew ruh ba ka surok Mawlai Bypass ka don ïa ka jingma na ka jingtwa jong ka khyndew ha kano-kano ka por namar katei ka surok kam don ïa kano-kano ka jingïada na ka jingtwa jong ka khyndew.
Hadien ba la ïoh ïa kane ka kaiphod, ka ophis jong ka Deputy Commissioner ka East Khasi Hills, ha u bnai Naitung mynta u snem ka la bthah ïa ka ophis u Block Development Officer (BDO), ban leh ïa kaba donkam bad ban maham lypa ruh ïa ki briew kiba shong ba sah marjan bad katei ka ïing paki, bad na ka liang ki bor ba dei khmih ki la bthah ïa u trai katei ka building ban sangeh mardor ïa baroh ki jingtrei ha katei ka jaka namar ka lah ban wanrah jingma ïa ki mynsiem briew.
