Shillong, Nailur 17
Ka District Medical & Health Officer (DMHO) ka Dr. T.S Momin kaba dei ruh ka Member Secretary ka District Ayush Society, East Khasi Hills ka la pynshai halor ki jingkynnoh ba mih ki kynrum-kynram ha ka eksam thung kam.
Ha ka jingpynshai la ong ba ka jingpyntip paidbah ha kaba ïadei bad ka kam Ayush Medical Officer, District Programme Manager (DPM) bad staff Nurse hapoh ka National AYUSH Mission (NAM) ba la pynmih ha ka 12 tarik u bnai Rymphang 2024 ha ki kot khubor, U Nongsaiñ Hima bad ka Shillong Times bad ïa kane ka jingpyntip la pynmih ruh ha ka website jong ka ophis www.meghealth.gov.in. Ka tarik ba khatduh ban pyndap ïa ki jingpyndonkam ka la long ha ka 23 tarik u bnai Rymphang 2024 ha ka por 4:30 janmiet.
Shuh shuh la ong, ha kaba ïadei bad ki kyrteng jong ki nongthep kam kiba la bit la biang ki kot ki sla la pynmih ha ka 16 tarik u bnai Jymmang 2024 ha ka website jong ka ophis. La pynmih shuh ïa ki kyrteng jong ki nongthep kam kiba la bit ka biang ki kot ki sla na ka bynta ka eksamin da kaba la shu thoh (written examination) na ka bynta kitei ki post ba la kdew ha ka bynta ba nyngkong la pynmih ha ka 27 tarik u bnai Jymmang 2024 da kaba ai jingpyntip ruh ha ki kot khubor ba la kdew haneng.
Kumta, ha kaba ïadei bad kitei ki jingshisha bad ki jingpynshai, ka DMHO ka kwah ban ïathuh ba ki nongthep kam kiba la shah jied na ka bynta ka Personal Interview bad ka jingpynshisha ka la long tang ïa kito ki nongthep kam kiba la pyndep ïa kitei ki eksamin ba la kdew haneng.
