Shillong, Nailur 18
Ki nongdie doh masi ha Ïewduh haba pynpaw ïa ka jingpyrshah kaba jur halor ka jingmih ki kynhun ban khang pynïap bad bam doh masi, ki la ong ba kin pyndeng da ki snier masi lada don ki kynhun kiba thmu ban wan ïaid paidbah ban khang bam doh masi ha nong bah Shillong.
Ha jingïakren bad u nongthoh khubor, ki nongdie doh masi ha Ïewduh ki la pynpaw ïa ka jingbym sngew ïahap bad bym lah ban pdiang ïa ka jingthmu jong kita ki shit niam Hindu kiba thmu ban wan khang bam doh masi namar kum ki jaidbynriew Khasi ki bang bha ban bam ïa ka doh masi.
Katba na ka liang jong ki longkmie kiba die ïa ki doh snier masi, ki la ong ba lada don kiba wan khang bam doh masi, kin leit ban pyndeng syndon da ka snier masi ïa kita ki nongpynbna kum ka dak ban pynpaw ïa ka jingpyrshah ka jong ki.
Kine ki nongdie doh masi ki la pynpaw ruh ba lada lah khang ïa ka jingbam doh masi, kan ym myntoi ban ong ban dang don ha Ri Khasi, hynrei ka la bha ban leit sha Bangladesh bad Pakistan, ha kaba ka jingbam doh masi ka long kaba laitluid.
Shuh shuh kine ki nongdie doh masi ki la ong lada khang ban bam ïa ka doh masi, kan ktah jur bha ïa u khiew-ja jong ki namar dei lyngba kane ka kam ba ki lah ban pyndap ïa la ka ïing ka sem bad ban bsa bad phah skul ïa la ki khun ki kti. Katba na ka liang jong kawei ka longkmie ka la ong ba lada ïa u drok kim lah ban khang ne pynduhjait kumno kin khang pat ïa ka doh masi. Ki la ong ruh ba lada khang ban bam ne die doh masi, satang ban leit tuh ban pyndap pynbiang ïa ki khun ki kti.
Katba na ka liang jong uwei u rangbah na ka shnong Laitkyrhong uba kamai jakpoh da kaba die doh thad masi, u la pynpaw ïa ka jingpyrshah lada khang ban bam doh masi namar kane ka kam ka dei kaba kamai jakpoh.
Une rangbah u la ïathuh ba u ju wan thied doh masi na Ïewduh ban thad ha Laitkyrhong bad u sa leit pat ban die sha kylleng ki shnong. U la ïathuh ruh ba ha ka shi sngi u ju thad haduh 20 kilo ka doh masi hynrei don ki por ba ka don ka jingduhnong bad don ki por pat ka don ka jingïoh nong.
Ha kawei pat ka liang, haba ïoh ban ïakren bad katto-katne ki ‘riew paidbah kiba wan thied doh masi ha Ïewduh, ki la pynpaw ïa ka jingsngew pyrshah lang lada khang bam doh masi. Kane ka jingsngew pyrshah ki paidbah ka dei namar ki don ki kynhun shit niam Hindu kiba mut ïaid paidbah ha nongbah Shillong ban ïalap khang bam doh masi bad ruh ban pynbna ïa ka masi kum ka kmie jong ka Ri.
