Khliehriat, Nailur 19
Haduh 300 ngut ki nongñiah trok jong ka karkhana Star Cement ki la pynlong ïa ka jingïakhih sangeh treikam kaba khlem buh por kaba la sdang naduh ka 18 tarik Nailur namar ka jingbym pynurlong ïa ki jingdawa jong ki, da ki nongpynïaid jong katei ka kompani kaba don ha Lumshnong, East Jaiñtia Hills District.
Kitei ki nongñiah trok ki la pynpaw ïa ki jingdawa jong ki ha ka shithi sha u Director ka tnad Transport jong katei ka kompeni.
Ka jingdawa kaba nyngkong ka long ba ka kompeni kam dei ban weng kam mardor ïa ki tang namar ba uno-uno u nongñiah trok u shim shuti na kino-kino ki daw.
Ki la dawa tulop ba ka dei ban long T.30,000 shi bnai namar ka jingkiew dor jong ka bam ka dih bad kumta ter-ter.
Ki la dawa ban ai ka ‘diesel’ kumba ju long, kata haduh Umroi 165 litar bad lada leit sha Byrnihat 175 litar bad 60 litar kumba ju long namar ba wanphai thylli.
Shuh shuh ki la dawa ba dei ban pynkiew ka bai bam ha lynti bad kiwei-kiwei de ki jinglut na bynta ki nongñiah jong ki trok 12 shaka na ka T.2000 sha ka T.2500 bad na bynta ki nongñiah trok 16 shaka na ka T.3000 sha ka T.4500.
