Shillong, Nailur 28
Ka Hynñiewtrep Youths’ Council (HYC), Nong-trai Unit ha ka 26 tarik Nailur 2026 ka la ïoh bat ïa arngut ki kynthei ba suba dei na Bangladesh, ha Nongtrai bad pynpaw ba kitei ki briew ki wan rung lyngba ka khappud ka India bad Bang-ladesh.
Haba ïadei kane ka jingjia la buh jingujor FIR ha Mawsynram Police Station lyngba u Bah Buddin Shabong, Assistant Secretary ka HYC Nongtrai Unit ha katei kajuh hi ka sngi ba la ïoh ban bat ïa kitei ki arngut.
Katkum ka FIR, kine ki arngut, ki kynthup ka Jhinuk Hijrani ba 22 snem ka rta, ka Priyanka
Kumari ba 20 snem ka rta bad ba la ïohbat ïa ki na ka kali kaba don ïa u Registration Number ML 05 AC 5971 bad la pynngat mukotduma ïa ki baroh arngut hapoh Section 12(1)(a) bad (c) jong ka Passport Act, 1967.
Ka HYC Nongtrai Unit ka kyntu ïa ki bor ba dei khmih ban pynlong ïa ka jingtohkit kaba bnïah, kaba laitluid bad kaba hok, khnang ban pynshisha bad lap ïa ka jinglong trai ri jong kine ki arngut bad ban tohkit ruh ïa ki kot ki sla jong ki, kumjuh ruh ban tip ïa ka lynti ba ki la wan rung bad ban lap ïoh don kiwei ki briew kiba ïarap ban pynrung ïa ki.
Nalor kata ka HYC ka la kyntu ruh ïa ki nongshong shnong, khamtam ïa kiba sah ha ki thaiñ khappud, ban long kiba husiar bad ban pyntip mar-mar sha ka thanad kaba hajan lane sha ki bor ba dei khmih lada ki ïohi ïa kino-kino ki jingwan rungtuh jong ki briew na Bangladesh khnang ba ka jingrung be-aiñ bad kiwei ki kam ba long pyrshah ïa ka aiñ yn lah ban khanglad.
