Shillong, Nailur 28
3 tylli ki Polytechnic hapoh Meghalaya kiba la dep mang pisa da ka Sorkar Pdeng ha u snem 2009 haduh mynta ym pat dep pyntrei pura bad kawei na ki Polytechnic kaba don ha South Garo Hills ka kam ka dang ïaid tang kumba 64-65 per cent.
U Chairman ka Esti-mate Committee jong ka ïingdorbar thawaiñ Bah Mayralborn Syiem, uba dei ruh u MLA ka Nongpoh constituency u la ïathuh ba ka committee ka la pynlong ïa ka jingïalang bishar bniah bad ka tnad pule puthi halor kitei ki lai tylli ki projek.
“Ngi la ïakren ïa ki mat ha kaba ïadei bad ki lai tylli ki Polytechnic – kawei ha Nongkrah, Nongpoh ha Ri-Bhoi, kawei ha Nongstoiñ, West Khasi Hills bad kawei ha Gasuapara ha South Garo Hills,” ong u Bah Mayralborn.
U la ong ba ïa ki projek la mynjur da ka Ministry of Human Resource Development bad mynta ka hap hapoh ka Ministry of Education hynrei ka jingtrei Civil Work haduh mynta la dep tang na ka bynta ka administrative block bad katto katne ki kamra klas.
“Ngi la buddien ïa kane ka kam namar ba la pyllait ïa ka pisa. Ngi la bishar bniah ïa ka jingïaid shaphrang ha ki kam ba pyntrei bad ha ka liang ka pisa tyngka,” u la ong.
Katkum ka jingong u Bah Mayralborn, ka Nongpoh bad Nongstoiñ Polytechnic ki la jan dep artad.
“Ki Polytechnic ha Nongpoh bad Nongstoiñ ki la jan dep kumba 100 per cent. Ka PWD (Building) kan aiti noh sha ka tnad pule puthi bad mynta yn sa leh sa kiwei ki kam kum ka jingpynbiang um, ka bording bad ban mang ïa ki kam. Ïa ka jingtyrwa ban mang ïa ki kam la phah sha ka Planning bad Finance ban ïoh jingmynjur,” u la ong.
Halor ka jingpynslem ban pyndep ïa ka Polytechnic ha Gasuapara, u Bah Mayralborn u la ong ba la bthah ïa ka tnad ban pynkloi ïa ka kam.
“Ka kam civil work ha Gasuapara ka dang sahdien ha kaba tang 64-65 per cent la pyndep. Ngi la bthah ïa ka tnad ban pynsted ïa ki kam na ka bynta ka jingmyntoi jong ki samla pule,” u la ong.
Haba kylli shaphang ki daw jong ka jingpynslem, u Bah Mayralborn u la ong, “Ki la pyntip ba ki don bun ki jingeh, nyngkong ka dei namar ka jaka. Ngi la bthah ba la mang ïa ka pisa paidbah bad ïa ka projek hap ban pyndep kloi katba lah.”
