Shillong, Nailur 28
Ka jingkynnoh haba thep kam Sorkar la ha kino-kino ki tnad treikam, ka ju don beit ka jingthep tuh ne pynrung tuh, da kaba shim pisa da ki lak tyngka na ki samla ba thepkam, tang ban ïoh ïa ka kam ba ki kwah, la lah ban sakhi bad pynthikna ba ka don shisha kaba kumta kata, katkum ka jingphla jong uwei u samla ba thepkam hapoh ka MCH, Nongstoiñ.
Une u samla haba ïathuh ïa kane ka jingjia sha ka VPP State Youth Wing, u la phla ba la don ki briew ba kynthup kawei ka longkmie kiba la pan pisa na u, haduh T.4 lak, ban pynrung ha katei ka kam.
U la ïathuh ba ki la pan shuwa tang T.1 lak bad ki la kular ban pynïoh ïa ka kam bad haba u la ïoh ïa ka kam, un hap ban siew dep noh sa kumba T.3 lak.
Une u samla wad kam u la kynnoh ruh ba ïa kane ka kam la don bynta lang da u MLA ka Nongstoiñ, kata u Bah Gabriel Wahlang.
Haba kylli, une u samla u la kynnoh ruh ba kita ki briew ba pan pisa ban pynïoh kam, kidei kiba wan na ka party NPP namar ki ong ba ka wan lyngba ruh na u MLA.
“Ka jingpan pisa jong ki, kadei beit ba ki kular ban ai kam ïa ki. Ka interview kadei la shi sngi, ngam ong ba kidei kiba shu pynrung tuh baroh, hynrei kin don kiba pass hok ne ïoh ïa ka kam, bad na kita ki don beit hi kiba shu pynrung tuh ban shu ai da ka pisa,” u la ong.
“Nyngkong nga la dep ai ka pisa T.1 lak hynrei hadien pat nga sngewdon ka jingktah halade, bad ngam sngewïahap bad nga kwah ba kan ïaid katkum ka jingbha,” u la bynrap.
