Shillong, Nailur 28
U MLA ka Nongstoiñ Konstitwensi, u Bah Gabriel Wahlang, u la pynshai paidbah ba kam shym don kano-kano ka jingdawa pisa na ka liang jong u, ïa kita ki samla thepkam ban pynïoh kam ha MCH, Nongstoiñ.
Kane ka jingpynshai na u MLA, ka la wan hadien ba la mih ka jingkynnoh na uwei u samla thepkam ha katei ka tnad, ba la dawa pisa na u, da kita ki briew kiba dei ki dkhot ka NPP haduh T.4 lak, da kaba kynnoh ba donkti lang ruh u MLA.
U Bah Gabriel Wahlang, u la pynpaw ka jingsngew lyngngoh bad ong ba um shym la tip ei-ei halor kane ka jingkynnoh ba u dawa pisa, da kaba bynrap ba ïa kita ar ngut ki briew kiba donkti pan pisa na ki samla thep kam, kum u nongmih khmat un sa shimkhia bad ban khot phah pynshai ïa ki ruh.
“Balei ki dawa pisa bad balei ki pynmih ruh ïa ka kyrteng jong nga. Ngam shym la phah ïano-ïano ban pynpass ïa ki eksamin thep kam hapoh katei ka jaka sumar da kaba shu shim pisa, hynrei nga ong ba kidei ban pass beit ka eksam bad ban ïoh ïa ka kam,” u la ong.
“Kumno ïa ki eksamin khlem pat pass, yn lah ban shim pisa?” la ong u Bah Gabriel.
Haba ïadei bad kane u MLA u la ong, ba un pynlong da ka jingïalang, ban pan jingshai na ki arngut bad kumjuh ruh na u briew uba la ai ïa ka pisa bad uba pynmih ruh ïa ka kyrteng u MLA.
Namarkata, u la ban jur ba kidei ban phla hakhmat ki lad pathai khubor, ba la u MLA u donkti ne-em ha katei ka kam.
Shuh shuh la sakhi katkum ki message lyngba ka Whatsapp, ba la don kiba kylli ïa u MLA, katno ban hap ai ka pisa ban ïoh kam, hynrei u MLA ka Nongstoiñ u la kren shai, ba ka kam kan ïaid khuid beit bad dei ban pass ka eksam ban ïoh ïa ka kam.
