Jowai, Nailur 28
Ka West Jaiñtia Hills District Congress Committee ha ka sngi Nyng-kong kala pynlong ka jingïaid paidbah ban dawa kem mardor ïa u Chief Election Commis-sioner (CEC) u Gyanesh Kumar halor ka jingkynnoh leh thok bad leh buit tuh ha ka jingpynrung kyrteng nongthep vote lyngba ka SIR.
Kane ka jingïaid rally ka la sdang na ophis treikam ka Congress kaba ha Ladthadlaboh, Jowai bad ïaid lyngba ka surok bah ter ter shaduh Iawmusiang bad pynkut pat ha Stand War.
Ïa kane ka jingïaid paidbah la ïalam da u MDC Ma Rikut N Parien uba dei ruh u President ka West Jaiñtia Hills District Congress Committee, ha ka jingdonlang u Ma Madonbai Rymbai President ka Jowai Block Congress Committee, General Secretary ka WJHDCC Ma Eklis War nalor kiwei-kiwei.
U MDC Ma Rikut N Parien ha ka jingkren u la ong kumba la paw ha ki lad pathai khubor, u CEC u la pyrshang ban pynduh noh ïa ki kyrteng jong ki nongthep vote kiba dei hok, bad pynrung da ki briew ki bym don ha ki Jylla hapoh ki Electoral Roll.
U la kynnoh ba kane baroh ka dei ka buit jong ka Sorkar BJP na ka bynta ban jop ïa ki ilekshon bapher-bapher hapoh ka ri India.
U la pyntip ruh ba arngut ki Election Commissioner kata u Sukbir Singh bad Vivek Joshi kila ujor haduh 14 sien pyrshah ïa ka jingleh donbor jong u CEC.
Katba u Ma Madonbai Rymbai u la kyntu ïa ki seng saiñpyrthei, kumjuh ki kynhun sengbhalang bad riew paidbah ban mih shakhmat ban ïashonkti lang bad ka Congress ban dawa weng ïa u Gyanesh Kumar kum u CEC.
