Shillong, Nailur 19
U MP ka Voice of the People Party (VPP) na Shillong Parliamentary konstitwensi, Dr. Ricky A.J. Syngkon u la kyntu ïa ka Land Port Authority of India (LPAI) jong ka tnad kam pohïing ka Sorkar Pdeng – tnad pynïaid khappud ban shimkhia halor katto-katne ki jingdonkam khnang ban pynbha ïa ka rukom treikam jong ka Dawki Land Port.
“Ha ka 14 tarik Nailur, 2024, nga la leit jngoh hi dalade ïa kane ka kad khaïi ban khmih ïa ka jinglong-jingman jong ka bad ha kane ka jingleit jngoh, nga la ïohi ïa katto-katne ki mat ba donkam kiba hap ban shimkhia noh kloi khnang ban pynbha ïa ka jinglah bad jingtreikam ba paka jong ka,” ong u Dr. Syngkon ha ka shithi ba la phah sha u Chairman ka LPAI, ka tnad kam pohïing ka Sorkar Pdeng – tnad pynïaid khappud, u Aditya Mishra.
Haba phai sha ki jingtei, u MP u la kyntu ba dei ban pyrshang katba lah ban pyntikna ïa ka jingpynbiang bording ka bym thut ha katei ka jaka baroh kawei, kumjuh ban shimkhia mardor halor ka jingtlot jong ka ‘network’ bad ki lad pynïasoh.
Ha kajuh ka por, u la ban jur halor ka jingdonkam ban pynsted ïa ka kam ba dang ïaid haba ïadei bad ka jingpynheh ïa ka surok kaba ïalam sha ka kad khaïi.
“Dei ban tei ïa ki jaka buh mar kynthup ïa ki jaka pyndait thah,” u la ong da kaba bynrap ba dei ruh ban buh ïa ki jaka peit bniah ban pyntikna ïa ki mar ba paka (ki mar kiba lah bad bym lah ban pyut).
Na ka liang u MP, u la ai jingmut ruh ban plie ïa ka jaka kynshew pisa ha kane ka kad khaïi na bynta ka jingkylliang pisa bar-ri lem bad kiwei-kiwei ki kam ba ïadei bad ka jaka kynshew pisa nalor ka kor ATM bad ka jingpynheh ïa ka jaka pynïeng kali.
Ha kawei ka liang, haba phai sha ka jingtreikam ki nongtrei ha katei ka kad khaïi, u Dr. Syngkon u la ban jur ba dei ban pynïaid ïa kane ka kad khaïi da ki briew kiba tbit ym da ki katto-katne ki briew ki bym don jingtbit ha ka kam.
“Dei ban pyrkhat bad buh hakhmat eh ïa ka jingpynrung kam ïa ki nongshong shnong ka thaiñ na ka bynta ki kyrdan ‘managerial’ bad ‘non-managerial’,” u la ong.
