Shillong, Nailur 23
Ka Khasi Students’ Union (KSU) lyngba ka Employment Monitoring Cell ka la ïakynduh ïa u Sampath Kumar, IAS, uba bat kum u Develop-ment Commissioner jong ka tnat Planning, Invest-ment, Promotion & Sustainable Development Department (PIPSDD) bad ban aiti da ka dorkhas.
Ha ka kyrwoh khubor ba la pyllait da u Chair-man ka KSU Employ-ment Monitoring Cell, u Reuben Najiar, u la ong kane ka jingleit ïakynduh ka KSU ka long ban tip naba kane ka tnat ka la aiti sha ka Agency Bharti Institute of Public Policy (ISB) ban thung ïa 28 tylli ki kam hapoh ka jylla ki ban long kum ki Consultant ban ïarap ïa ki District Magistrate (DM) bad ki Deputy Commissioner (DC).
Ka KSU ka lap ba la pynbna (advertise) ïa kine ki kam tang ha ka ‘LinkedIn’ kaba long tang kum kawei ka rynsan ‘social media app’ hynrei ym shym la pyllait paidbah lyngba ki’ website’ jong ki tnat sorkar ne ha ki kot khubor. Kane ka jingleh ka wanrah ba imat kan don ka jingthung kam kaba sop-sop khlem da pyntip ïa ki samla wad kam jong ka jylla.
Shuh-shuh la ong, ym shym pyntip bniah halor ka rukom ban shah jied ne mano ban lah ban aplai ïa kine ki kam ba la buh. La lap ruh ba kane ka agency ka buh kyndon ba 50% na kine ki kam yn leit sha ki briew nabar jylla. Ïa kane hi na ka liang ka Seng kan ym lah ban pdiang bad mar sien ujor, la weng noh ïa kane ka kyndon. Ka KSU kam lah ban sngewthuh balei ba hap thung ïa kine ki agency ban ïarap ïa ki Districts Magistrate bad ki Deputy Commissioner kiba la pass ïa ki eksamin MCS bad IAS bad kiwei-kiwei ki eksamin. Hato kine DM bad DC kim dei ki briew kiba la tbit lypa ban pynïaid ïa kino-kino ki skhim ne peit ïa kino-kino ki mat ba ki shah thung ha kine ki post?
Ka Seng ka lap ba la jyllei kine ki ‘consultancy agencies’ ha Secretariat bad man la ki tnat jong ka ophis sorkar. “Kaei ka jingmyntoi ba ngi ki paidbah ki ïoh na kum kine ki agency, ka kam aïu ba ki trei ba ki nongtrei sorkar kim lah bad ka policy aïu ki la lah ban shna na bynta ka jingbha jong ka imlang sahlang. Kine ki agency ki shu pynsyrwa ïa ka pisa u paidbah bad la thaw khnang ïa kine ki agency tang ban pynrung kam rung jam ïa ki khun ki heh ki haiñ. Tang katto katne ngut hi kiba ïoh da ka hok bad jingnang jingstad lajong,” la ong u samla Reuben.
Ka Seng ka ai jingmut ba da donkam kino-kino ki ‘research ne project ne data collection’, ka Sorkar ka dei ban ai sha ka NEHU ne kiwei ki skulbah jong ka Jylla khnang ba ki samla jong ka jylla hi kin ïoh kam bad kan plie lad ïa kiwei ki bynta jong ka pule puthi bad ki trai jylla hi kin sngewthuh kham bha ïa ka jylla lajong ban ïa ki agency ba na shabar.
Ha kawei pat ka liang, ka KSU ka dawa ba lada ka Sorkar ka ïaid shakhmat ïa kane ka kam lyngba kane ka agency, ka dei ban thep beit thik tang ïa ki trai muluk trai jylla ha baroh kine 28 tylli ki kam bad lada long da kumwei ka seng kan ym ailad. Ka Seng ka la ban ruh ba dei ban thung kam lyngba ki eksamin hynrei ym ban shu thung khlem don kino-kino ki kyndon ba biang.
La ong ba halor kine kiei-kiei baroh ba la pynpaw da ka KSU, na ka liang u Sampath Kumar, u la kular ban shimkhia halor ki mat bad jingmut ba la ai.
